غزہ کی تعمیرِ نو: ٹرمپ کے ‘بورڈ آف پیس’ کی ڈی پی ورلڈ کے ساتھ مذاکرات

امریکی صدر ڈونلڈ ٹرمپ کی جانب سے تشکیل دیے گئے بورڈ آف پیس کے نمائندوں نے غزہ میں سپلائی چین اور بنیادی ڈھانچے کے منصوبوں کے انتظام کے لیے دبئی کی ملٹی نیشنل کمپنی ڈی پی ورلڈ کے ساتھ مذاکرات کیے ہیں۔ فنانشل ٹائمز کی رپورٹ کے مطابق یہ بات چیت غزہ کی تعمیر نو کے لیے جاری کوششوں کا حصہ ہے۔

عالمی اداروں کا تخمینہ ہے کہ غزہ کی تعمیر نو پر تقریباً 70 ارب ڈالر لاگت آئے گی، جہاں گزشتہ دو برسوں کے دوران اسرائیلی بمباری سے عمارتوں کا چار بٹا پانچ حصہ تباہ ہو چکا ہے۔ معاملے سے واقف تین ذرائع کا حوالہ دیتے ہوئے اخبار نے بتایا کہ بات چیت کا محور ڈی پی ورلڈ اور بورڈ آف پیس کے درمیان لاجسٹکس کے انتظام کے لیے شراکت داری قائم کرنا ہے۔

یہ منصوبہ غزہ میں داخل ہونے والی انسانی امداد اور دیگر سامان کی ترسیل، ویئر ہاؤسنگ، ٹریکنگ سسٹمز اور سیکیورٹی کے امور کا احاطہ کرے گا۔ مذاکرات کے دوران دیگر تجاویز پر بھی غور کیا گیا جن میں غزہ یا قریبی مصری ساحل پر ڈی پی ورلڈ کی جانب سے ایک نئی بندرگاہ کی تعمیر شامل ہے۔ اس کے علاوہ جنگ سے تباہ حال علاقے میں فری ٹریڈ زون کے قیام کا امکان بھی زیر غور ہے۔

ڈی پی ورلڈ اور وائٹ ہاؤس کی جانب سے اس معاملے پر فوری طور پر کوئی ردعمل سامنے نہیں آیا ہے۔ صدر ٹرمپ نے گزشتہ ستمبر میں غزہ جنگ کے خاتمے کے اپنے منصوبے کی نگرانی کے لیے بورڈ آف پیس قائم کرنے کی تجویز دی تھی اور بعد ازاں کہا تھا کہ یہ بورڈ دیگر تنازعات کے حل کے لیے بھی کام کرے گا۔ ٹرمپ کے غزہ منصوبے میں اسرائیلی فوج کا انخلا شامل ہے، جس کے بعد حماس کی جانب سے ہتھیار ڈالنے پر تعمیر نو کا عمل شروع کیا جائے گا۔