ایرانی بندرگاہوں کا محاصرہ جنگی اقدام ہے، تہران کا امریکی خلاف ورزیوں پر سخت ردعمل

ایران کے وزیر خارجہ عباس عراقچی نے منگل کے روز امریکی جانب سے ایرانی بندرگاہوں کی ناکہ بندی کو جنگی اقدام قرار دے دیا ہے۔ انہوں نے واشنگٹن پر الزام عائد کیا ہے کہ وہ جاری جنگ بندی کی کھلی خلاف ورزی کر رہا ہے۔

سماجی رابطے کی ویب سائٹ ایکس پر اپنے ایک پیغام میں عباس عراقچی نے خبردار کیا کہ بندرگاہوں کی ناکہ بندی کشیدگی کم کرنے کی تمام کوششوں کو نقصان پہنچا رہی ہے۔ انہوں نے کہا کہ یہ اقدام جنگ بندی کے معاہدے کی صریح خلاف ورزی ہے۔

ایرانی وزیر خارجہ نے یہ انکشاف بھی کیا کہ ایک تجارتی جہاز کو نشانہ بنایا گیا ہے اور اس کے عملے کو یرغمال بنا لیا گیا ہے۔ انہوں نے اس واقعے کو جنگ بندی کی مزید سنگین خلاف ورزی قرار دیا۔

عباس عراقچی نے دو ٹوک الفاظ میں کہا کہ ایران بیرونی دباؤ کا مقابلہ کرنے اور اپنے قومی مفادات کے تحفظ کی مکمل صلاحیت رکھتا ہے۔ انہوں نے زور دیا کہ ایران پابندیوں کو غیر مؤثر کرنے، اپنے مفادات کا دفاع کرنے اور طاقت کے استعمال کے خلاف مزاحمت کرنا بخوبی جانتا ہے۔

یہ بیان ایک ایسے وقت میں سامنے آیا ہے جب واشنگٹن اور تہران کے درمیان کشیدگی میں اضافہ ہو رہا ہے اور دونوں ممالک ایک نازک جنگ بندی اور مذاکرات کی غیر یقینی صورتحال سے گزر رہے ہیں۔