پاکستان کی درخواست پر ٹرمپ کا جنگ بندی میں توسیع کا اعلان، بندرگاہوں کی ناکہ بندی برقرار

واشنگٹن (ویب ڈیسک) امریکی صدر ڈونلڈ ٹرمپ نے ایران کے ساتھ جاری جنگ بندی میں توسیع کا اعلان کر دیا ہے۔ صدر ٹرمپ کا کہنا ہے کہ امریکی فوج اپنے مجوزہ حملے کو فی الحال موخر کر رہی ہے تاکہ تہران کو جنگ کے خاتمے کے لیے ایک متفقہ تجاویز پیش کرنے کا مزید وقت مل سکے۔

امریکی صدر کے مطابق یہ فیصلہ پاکستانی ثالثوں کی درخواست پر کیا گیا ہے۔ اس سے قبل یہ جنگ بندی بدھ کے روز ختم ہونا تھی۔ صدر ٹرمپ نے سماجی رابطے کی ویب سائٹ پر اپنے پیغام میں کہا کہ انہوں نے اپنی فوج کو ہدایت کی ہے کہ وہ ایران کا محاصرہ جاری رکھیں اور ہر لحاظ سے چوکس رہیں۔ جنگ بندی میں اس وقت تک توسیع کی گئی ہے جب تک ایران اپنی تجاویز پیش نہیں کر دیتا اور مذاکرات کسی حتمی نتیجے پر نہیں پہنچ جاتے۔

ایران کی جانب سے صدر ٹرمپ کے بیان پر فوری طور پر کوئی ردعمل سامنے نہیں آیا ہے۔ نیم سرکاری خبر رساں ادارے تسنیم کا کہنا ہے کہ تہران کی جانب سے موقف کا باقاعدہ اعلان بعد میں کیا جائے گا۔

سماجی رابطے کی ویب سائٹ پر بیان جاری کرنے سے چند گھنٹے قبل تک صدر ٹرمپ جنگ بندی میں توسیع کی مخالفت کر رہے تھے اور انہوں نے ایران کو تنبیہ کی تھی کہ وقت تیزی سے ختم ہو رہا ہے۔

امریکی صدر کا یہ یو ٹرن اس وقت سامنے آیا ہے جب ایرانی حکام کی جانب سے ملکی بندرگاہوں پر امریکی بحری ناکہ بندی کی شدید مذمت کی گئی تھی جس کے باعث پاکستان میں بدھ کے روز شیڈول مذاکرات میں ایران کی شرکت غیر یقینی صورتحال کا شکار ہو گئی تھی۔ اس خبر کو مزید اپ ڈیٹ کیا جائے گا۔