وکٹر ویمبنیاما کی انجری، پورٹ لینڈ ٹریل بلیزرز کا سان انتونیو اسپر کو اپ سیٹ شکست

پورٹ لینڈ ٹریل بلیزرز نے این بی اے ویسٹرن کانفرنس پلے آف سیریز کے ایک سنسنی خیز مقابلے میں سان انتونیو سپرز کو 103 کے مقابلے میں 106 پوائنٹس سے شکست دے دی۔ سان انتونیو کے سٹار کھلاڑی وکٹر ویمبانیاما دوسرے کوارٹر کے دوران جرو ہالیڈے سے ٹکرا کر گرنے کے بعد سر پر چوٹ لگنے کے باعث کھیل سے باہر ہو گئے۔ بائیس سالہ کھلاڑی کو کنکشن پروٹوکول کے تحت باقی میچ سے باہر کر دیا گیا تھا۔ سپرز ایک موقع پر 14 پوائنٹس کی برتری حاصل کر چکے تھے تاہم میچ کے آخری لمحات میں پورٹ لینڈ نے شاندار واپسی کرتے ہوئے فتح اپنے نام کی۔ سکوٹ ہینڈرسن نے 31 اور جرو ہالیڈے نے 16 پوائنٹس سکور کیے۔ سیریز کا تیسرا میچ جمعہ کو پورٹ لینڈ میں کھیلا جائے گا۔

دوسری جانب لاس اینجلس لیکرز نے ہیوسٹن راکٹس کو 94 کے مقابلے میں 101 پوائنٹس سے شکست دے کر سیریز میں دو صفر کی برتری حاصل کر لی ہے۔ اہم کھلاڑیوں کی انجریز کے باوجود لیکرز نے لیبرون جیمز کی قیادت میں عمدہ کھیل پیش کیا۔ لیبرون جیمز نے 28، مارکس سمارٹ نے 25 اور لیوک کینارڈ نے 23 پوائنٹس بنائے۔ لیبرون جیمز نے کہا کہ ٹیم کو تیسرے میچ کے لیے مزید محتاط رہنا ہوگا کیونکہ ہیوسٹن کا ہوم گراؤنڈ پر کھیلنا ہمیشہ مشکل ہوتا ہے۔

ایسٹرن کانفرنس پلے آف میں فلاڈیلفیا 76رز نے بوسٹن سیلٹکس کو 97 کے مقابلے میں 111 پوائنٹس سے ہرا کر سیریز ایک ایک سے برابر کر دی ہے۔ وی جے ایجکومب نے 30 جبکہ ٹائریس میکسی نے 29 پوائنٹس کے ساتھ ٹیم کی جیت میں کلیدی کردار ادا کیا۔ فلاڈیلفیا کے کوچ نک نرس نے اپنی ٹیم کے دفاعی کھیل کو سراہتے ہوئے کہا کہ کھلاڑیوں نے ابتدائی دباؤ کے باوجود شاندار واپسی کی۔ بوسٹن کی جانب سے جیلن براؤن نے 36 پوائنٹس سکور کیے تاہم وہ ٹیم کو شکست سے نہ بچا سکے۔ سیریز کا تیسرا میچ جمعہ کو فلاڈیلفیا میں کھیلا جائے گا۔