روسی کمیونسٹ رہنما کی معاشی بحران کے باعث انقلاب کی وارننگ

روس کی کمیونسٹ پارٹی کے سینئر رہنما نے خبردار کیا ہے کہ ملکی معیشت کی بگڑتی صورتحال 1917 کے انقلاب جیسی سنگین صورتحال کو جنم دے سکتی ہے۔ انہوں نے حکومت پر زور دیا ہے کہ وہ فوری طور پر اصلاحات کا عمل شروع کرے۔

اکاسی سالہ جیناڈی زیوگانوف نے اسٹیٹ ڈوما کے اجلاس سے خطاب کرتے ہوئے کہا کہ اگر حکومت نے بروقت مالیاتی اور معاشی اقدامات نہ کیے تو رواں سال موسم خزاں تک ملک میں انتشار پھیل سکتا ہے۔ انہوں نے واضح کیا کہ قوم کو 1917 کے واقعات کو دہرانے کی اجازت نہیں دی جا سکتی۔

زیوگانوف نے صدر ولادیمیر پیوٹن کی حمایت کا اعادہ کرتے ہوئے تنقید کا رخ وفاقی حکومت اور مرکزی بینک کی جانب موڑا۔ انہوں نے کہا کہ ہم پیوٹن کی حکمت عملی کے حامی ہیں لیکن حکومت زمینی حقائق کو نظر انداز کر رہی ہے، جس کے باعث عوام میں شدید بے چینی پائی جاتی ہے۔

روسی پارلیمنٹ کے ایوان زیریں میں کی گئی یہ تقریر ایسے وقت میں سامنے آئی ہے جب ستمبر میں پارلیمانی انتخابات متوقع ہیں۔ مبصرین کے مطابق زیوگانوف کا مقصد معاشی دباؤ کا شکار عوام کے ووٹ حاصل کرنا اور حکمران جماعت یونائیٹڈ رشیا کی ساکھ کو بہتر بنانا ہے۔

خیال رہے کہ سخت سیکیورٹی قوانین اور یوکرین جنگ کے باعث روس میں عوامی احتجاج پر پابندیاں عائد ہیں، جس کے سبب فی الحال کسی بڑی سماجی بغاوت کے آثار دکھائی نہیں دیتے۔ تاہم، پیوٹن نے گزشتہ ہفتے معاشی نمو میں کمی پر اپنی اعلیٰ قیادت کو سخت سرزنش کی تھی۔

روس کی تین اعشاریہ ایک ٹریلین ڈالر کی معیشت مغربی پابندیوں کے باوجود اب تک مستحکم رہی ہے۔ بین الاقوامی مالیاتی فنڈ نے روس کی رواں سال کی معاشی ترقی کی پیشگوئی کو صفر اعشاریہ آٹھ فیصد سے بڑھا کر ایک اعشاریہ ایک فیصد کر دیا ہے۔

واضح رہے کہ 1917 کے انقلاب نے روس کی بادشاہت کا خاتمہ کر کے بالشویک اقتدار کی راہ ہموار کی تھی، جس کے نتیجے میں سوویت یونین کا قیام عمل میں آیا تھا۔ صدر پیوٹن، جو 1999 سے اقتدار میں ہیں، اکثر اپنے بیانات میں انقلاب کو تباہ کن قرار دیتے ہوئے ملکی استحکام پر زور دیتے آئے ہیں۔