امریکی افواج کی بحر ہند میں ایرانی تیل بردار جہاز قبضے میں لینے کی کارروائی

واشنگٹن میں امریکی حکام کے مطابق امریکی افواج نے بحر ہند میں ایک جہاز کو قبضے میں لے لیا ہے جس پر مبینہ طور پر ایرانی تیل منتقل کیا جا رہا تھا۔ امریکی انڈو پیسیفک کمانڈ کی جانب سے کیے گئے اس آپریشن میں میجسٹک ایکس نامی جہاز کی تلاشی لی گئی۔

امریکی محکمہ دفاع نے واضح کیا ہے کہ ایران کی معاونت کرنے والے بحری جہازوں کو روکنے کا سلسلہ جاری رہے گا، قطع نظر اس کے کہ وہ کہاں سے آپریٹ کر رہے ہیں۔ پینٹاگون کا موقف ہے کہ عالمی سمندری حدود کو پابندیوں کی زد میں آنے والی قوتیں اپنی ڈھال کے طور پر استعمال نہیں کر سکتیں اور غیر قانونی عناصر کے خلاف کارروائیاں جاری رہیں گی۔

دوسری جانب صدر ڈونلڈ ٹرمپ نے آبنائے ہرمز میں امریکی آپریشنز کو تین گنا بڑھانے کا حکم دے دیا ہے۔ صدر ٹرمپ نے خبردار کیا ہے کہ اس معاملے میں کسی قسم کی تاخیر یا نرمی برداشت نہیں کی جائے گی۔

سوشل میڈیا پر جاری بیان میں صدر ٹرمپ نے امریکی بحریہ کو ہدایت کی ہے کہ جسامت سے قطع نظر تمام مشکوک جہازوں کو نشانہ بنایا جائے۔ انہوں نے مزید کہا کہ آبنائے ہرمز میں بارودی سرنگیں بچھانے میں ملوث کسی بھی کشتی کو بلا تاخیر تباہ کر دیا جائے گا۔

صدر ٹرمپ نے دعویٰ کیا ہے کہ اب تک 159 دشمن بحری جہازوں کو غرق کیا جا چکا ہے اور امریکی مائن سویپرز آبی گزرگاہ کو صاف کرنے کے لیے سرگرم عمل ہیں۔ میڈیا سے گفتگو کرتے ہوئے صدر نے یہ بھی واضح کیا کہ ایران کے ساتھ جنگ بندی کی توسیع کے لیے کوئی حتمی ٹائم لائن طے نہیں کی گئی ہے۔