پاکستان اور ایران کے درمیان کوئی بداعتمادی نہیں، امریکا سے مذاکرات کا امکان ہے: ایاز صادق

اسپیکر قومی اسمبلی سردار ایاز صادق نے واضح کیا ہے کہ پاکستان اور ایران کے درمیان کسی قسم کا کوئی بداعتمادی کا خلا موجود نہیں ہے۔ لاہور میں ایک تقریب سے خطاب کرتے ہوئے انہوں نے کہا کہ دونوں ممالک کے مابین تعلقات مستحکم ہیں اور پاکستان خطے میں امن کے قیام کے لیے اپنا کلیدی کردار ادا کر رہا ہے۔

سردار ایاز صادق نے انکشاف کیا کہ پاکستان کی سہولت کاری سے امریکا اور ایران کے درمیان مذاکرات کا سلسلہ جلد دوبارہ شروع ہونے کی توقع ہے۔ انہوں نے کہا کہ اسلام آباد عالمی طاقتوں کے مابین بات چیت کو فروغ دینے کے لیے ایک منفرد اور اہم کردار ادا کر رہا ہے۔

جندیاڑہ روڈ سے بھیسن گاؤں تک سڑک کی تعمیر کے منصوبے کے افتتاح کے موقع پر گفتگو کرتے ہوئے انہوں نے بتایا کہ حلقہ این اے 120 کے عوامی نمائندوں نے وزیر اعلیٰ پنجاب سے ترقیاتی فنڈز کے حصول کے لیے بھرپور کوششیں کی ہیں۔ انہوں نے خدشہ ظاہر کیا کہ شدید گرمی کے باعث اگر ترقیاتی کاموں کا آغاز بروقت نہ ہوا تو انہیں جون سے قبل مکمل کرنا مشکل ہو جائے گا۔

ن لیگی رہنما نے کہا کہ پارٹی قیادت بالخصوص نواز شریف کی حمایت سے جاری ترقیاتی منصوبے رواں برس کے آخر تک مکمل کر لیے جائیں گے۔ انہوں نے ملکی سفارتی پوزیشن پر اطمینان کا اظہار کرتے ہوئے کہا کہ وزیراعظم شہباز شریف، نائب وزیراعظم اسحاق ڈار اور عسکری قیادت کی کاوشوں سے عالمی سطح پر پاکستان کا وقار بلند ہوا ہے۔

مقبوضہ کشمیر کے پہلگام واقعے کا ذکر کرتے ہوئے انہوں نے کہا کہ پاکستان نے غیر جانبدارانہ تحقیقات کا مطالبہ کیا تھا جس کے جواب میں بھارت نے عسکری جارحیت کی لیکن پاکستان نے دشمن کو شکست سے دوچار کیا۔ انہوں نے زور دیا کہ پاکستان کے چین، امریکا، سعودی عرب اور ایران کے ساتھ تعلقات انتہائی مضبوط ہیں اور خطے میں امن کے لیے پاکستان کی کوششیں مسلسل جاری ہیں۔