ایران اور امریکہ کے درمیان مذاکرات میں پیش رفت کی امید، ترک وزیر خارجہ کا بیان

ترکی کے وزیر خارجہ ہاکان فیدان نے ایران اور امریکہ کے درمیان متوقع مذاکرات کے حوالے سے امید کا اظہار کیا ہے جو ممکنہ طور پر پاکستان میں منعقد ہوں گے۔ میڈیا سے گفتگو کرتے ہوئے ہاکان فیدان نے کہا کہ ترکی ان مذاکرات کی بھرپور حوصلہ افزائی کر رہا ہے اور توقع ہے کہ اہم رکاوٹیں جلد دور کر لی جائیں گی۔

ترک وزیر خارجہ کے مطابق جوہری مذاکرات کے چند اہم نکات حل کے قریب ہیں۔ انہوں نے کہا کہ حالیہ جنگ بندی میں توسیع ایک مثبت پیش رفت ضرور ہے تاہم یہ حتمی معاہدے کے لیے کافی نہیں ہے۔

ہاکان فیدان نے اس بات پر زور دیا کہ آبنائے ہرمز کی صورتحال براہ راست ان مذاکرات سے جڑی ہوئی ہے۔ ایک کامیاب معاہدے کی صورت میں اس تزویراتی گزرگاہ پر سمندری ٹریفک کی بحالی ممکن ہو سکے گی۔

انہوں نے مزید کہا کہ بارودی سرنگوں کے خاتمے کے لیے بین الاقوامی تعاون قائم کیا جا سکتا ہے۔ ہاکان فیدان نے واضح کیا کہ ترکی کسی بھی نئی عسکری پیش رفت میں غیر جانبدارانہ موقف برقرار رکھے گا اور تمام متعلقہ فریقین کے ساتھ رابطے میں رہے گا۔