اگر ایران مذاکرات چاہتا ہے تو ہم سے رابطہ کرے، ڈونلڈ ٹرمپ

امریکی صدر ڈونلڈ ٹرمپ نے اتوار کے روز کہا ہے کہ اگر ایران دونوں ممالک کے درمیان جاری کشیدگی کے خاتمے کے لیے مذاکرات کا خواہاں ہے تو وہ امریکہ سے رابطہ قائم کر سکتا ہے۔ فاکس نیوز کے پروگرام دی سنڈے بریفنگ میں گفتگو کرتے ہوئے ڈونلڈ ٹرمپ نے کہا کہ اگر وہ بات چیت کرنا چاہتے ہیں تو ہمارے پاس آ سکتے ہیں یا ہمیں فون کر سکتے ہیں۔ انہوں نے مزید کہا کہ ہمارے پاس محفوظ مواصلاتی ذرائع موجود ہیں۔

دوسری جانب خطے میں امن کی کوششوں کو اس وقت دھچکا لگا جب صدر ٹرمپ نے ہفتے کے روز اپنے ایلچی اسٹیو وٹکوف اور جیرڈ کشنر کا دورہ پاکستان منسوخ کر دیا۔ یہ پیش رفت ایک ایسے وقت میں سامنے آئی ہے جب ایرانی وزیر خارجہ عباس عراقچی پاکستانی حکام سے ملاقات کے بعد اسلام آباد سے روانہ ہو چکے تھے۔

ذرائع کے مطابق امریکی وفد کی عدم موجودگی کے باوجود ایرانی وزیر خارجہ عباس عراقچی دوبارہ پاکستان پہنچ چکے ہیں۔