’دی ڈیول ویئر پراڈا‘: مرانڈا پرسٹلی کے کردار کے پیچھے چھپی حقیقت کا انکشاف

مشہور ہالی وڈ فلم دی ڈیول ویئر پراڈا کی اداکارہ ایملی بلنٹ نے انکشاف کیا ہے کہ سن دو ہزار چھ میں بننے والی اس فلم کی شوٹنگ کے دوران وہ اپنی ساتھی اداکارہ میرل اسٹریپ سے کافی خوفزدہ رہتی تھیں۔ سیریس ایکس ایم فرنٹ رو ری یونین کے دوران گفتگو کرتے ہوئے ایملی بلنٹ نے بتایا کہ میرل اسٹریپ نے فلم کے کردار مرانڈا پریسلے میں ڈھلنے کے لیے شوٹنگ کے دوران بھی اسی کرخت انداز کو برقرار رکھا۔

ایملی بلنٹ کا کہنا تھا کہ میرل اسٹریپ کیمرے کی آنکھ بند ہونے کے باوجود مرانڈا زون میں رہتی تھیں جس کی وجہ سے سیٹ پر ایک عجیب سی خاموش کشیدگی طاری رہتی تھی۔ انہوں نے مزید کہا کہ میرل اسٹریپ اگرچہ بات چیت کے لیے دستیاب تھیں مگر وہ اپنے ساتھی اداکاروں سے ایک جذباتی دوری بنا کر رکھتی تھیں جس کی وجہ سے وہ گرم جوشی اور مزاح دیکھنے کو نہیں ملا جو عام طور پر شوٹنگ کے دوران ہوتا ہے۔

میرل اسٹریپ نے اس مشاہدے کی تصدیق کرتے ہوئے کہا کہ انہوں نے دانستہ طور پر کچھ فاصلہ قائم رکھا تھا تاکہ مرانڈا پریسلے کے بااختیار کردار کی عکاسی بہتر انداز میں ہو سکے۔ انہوں نے تسلیم کیا کہ اس فیصلے کی قیمت انہیں تنہائی کی صورت میں ادا کرنی پڑی کیونکہ وہ دور سے اپنے ساتھی اداکاروں کے قہقہے سنتی تھیں جبکہ خود کردار کی حدود میں مقید رہتی تھیں۔

اس تجربے نے ایملی بلنٹ کی پیشہ ورانہ زندگی پر گہرے اثرات مرتب کیے۔ ایک ابھرتی ہوئی اداکارہ کے طور پر اس دباؤ نے انہیں ایک ایسی اسسٹنٹ کا کردار نبھانے میں مدد دی جو ہر وقت اپنے باس کے خوف میں مبتلا رہتی ہے۔ بلنٹ نے اس موقع پر فلم کے ہدایت کار ڈیوڈ فرینکل کا شکریہ ادا کیا جنہوں نے انہیں یہ کردار دے کر ان کے کیریئر کو نئی جہت دی۔

یہ انکشافات ایک ایسے وقت میں سامنے آئے ہیں جب دی ڈیول ویئر پراڈا کے طویل عرصے سے منتظر سیکوئل کی ریلیز کی تیاریاں حتمی مراحل میں ہیں۔ فلم کے دوسرے حصے میں مرانڈا پریسلے کو میڈیا انڈسٹری میں آنے والے بڑے تغیرات کا سامنا ہوگا جبکہ ایملی بلنٹ کا کردار ایک بااختیار ایگزیکٹو کے طور پر سامنے آئے گا، جو فیشن اور میڈیا کی بدلتی ہوئی حقیقتوں کی عکاسی کرے گا۔