فرانس کے ساحل پر پانچ سو سال قدیم تباہ شدہ بحری جہاز سے نوادرات دریافت

فرانسیسی ساحل کے قریب بحیرہ روم کی گہرائیوں میں سولہویں صدی کے ایک تجارتی جہاز کا ملبہ دریافت کر لیا گیا ہے۔ یہ جہاز سطح سمندر سے ڈیڑھ میل سے زائد گہرائی میں موجود ہے اور اسے فرانسیسی علاقائی پانیوں میں اب تک کا سب سے گہرا دریافت ہونے والا جہاز قرار دیا جا رہا ہے۔

بحریہ کے ایک افسر سیباسٹین کی نگرانی میں ایک جدید روبوٹ کی مدد سے اس مقام کی تحقیق کی جا رہی ہے۔ یہ روبوٹ کیمروں اور خاص پنجوں سے لیس ہے جو انتہائی احتیاط کے ساتھ قدیم نوادرات کو سمندر کی تہہ سے نکالنے کا کام کر رہا ہے۔ ماہرین کا کہنا ہے کہ اس گہرائی میں کام کے دوران ذرا سی غفلت نوادرات کو نقصان پہنچا سکتی ہے یا سمندری مٹی کو اڑا کر بصارت کو متاثر کر سکتی ہے۔

ماہرینِ آثار قدیمہ کے مطابق یہ جہاز شمالی اٹلی سے روانہ ہوا تھا اور اس میں سرامک کے برتن اور دھاتی سلاخیں لدی ہوئی تھیں۔ روبوٹ کی جانب سے لی گئی چھیاسی ہزار سے زائد تصاویر کے ذریعے اس مقام کا تھری ڈی ماڈل تیار کیا جا رہا ہے۔ کیمروں کی مدد سے جہاز کے ملبے میں توپیں، مچھلی اور پھولوں کے نقوش والے برتن اور پلیٹیں دیکھی گئی ہیں۔

اس مشن کی سربراہ میرین سڈانیا کا کہنا ہے کہ سولہویں صدی کے تجارتی جہازوں کے بارے میں تحریری مواد کی کمی ہے، اس لیے یہ دریافت سمندری تاریخ اور اس دور کے تجارتی راستوں کو سمجھنے کے لیے انتہائی اہم ہے۔ انہوں نے بتایا کہ سمندر سے نکالے گئے برتنوں میں سے ایک پر نیلے اور زعفرانی رنگ کے نقوش موجود ہیں جو اس دور کے فن کی عکاسی کرتے ہیں۔

تحقیق کے دوران اس مقام پر جدید دور کا کچرا جیسے سوڈا کین اور دہی کے خالی ڈبے بھی ملے ہیں جو سمندری آلودگی کی نشاندہی کرتے ہیں۔ اس سے قبل فرانسیسی حکام نے دو ہزار انیس میں ٹولون کے ساحل پر ایک فرانسیسی آبدوز لا منرو کا ملبہ دریافت کیا تھا جو ایک اعشاریہ چار میل گہرائی میں موجود تھی۔

ادھر منگل کے روز حکام نے سویڈن کے ساحل پر بھی ایک اور سولہویں صدی کے جہاز کے ملبے کی دریافت کا اعلان کیا ہے جو ایک فوجی مشق کے دوران سامنے آیا۔ فرانسیسی ماہرین اس مقام کی لوکیشن کو خفیہ رکھ رہے ہیں تاکہ اسے محفوظ رکھا جا سکے۔ مارسیلز کی لیبارٹری میں ان نوادرات کی صفائی اور مزید تحقیق کا عمل جاری ہے تاکہ سمندری تاریخ کے پوشیدہ گوشوں کو سامنے لایا جا سکے۔