ایران کشیدگی: ٹرمپ کی جرمنی، اٹلی اور اسپین سے امریکی فوج کم کرنے کی دھمکی

امریکی صدر ڈونلڈ ٹرمپ نے ایران کے خلاف جاری فوجی مہم پر یورپی اتحادیوں کے ساتھ بڑھتے ہوئے اختلافات کے پیش نظر جرمنی میں تعینات امریکی فوجیوں کی تعداد میں کمی کی دھمکی دی ہے جبکہ اس فیصلے کا اطلاق اٹلی اور اسپین پر بھی ہو سکتا ہے۔

صدر ٹرمپ نے بدھ کے روز سوشل میڈیا پلیٹ فارم ٹروتھ سوشل پر اپنے پیغام میں کہا کہ امریکہ جرمنی میں اپنے فوجیوں کی تعداد میں ممکنہ کمی کا جائزہ لے رہا ہے اور اس حوالے سے حتمی فیصلہ جلد کیا جائے گا۔

جمعرات کے روز اس دھمکی میں مزید شدت پیدا کرتے ہوئے امریکی صدر نے واضح کیا کہ فوجیوں کی واپسی کا دائرہ کار اٹلی اور اسپین تک بھی پھیل سکتا ہے۔ سی این این کی رپورٹ کے مطابق ایک سوال کے جواب میں ٹرمپ کا کہنا تھا کہ یورپی ممالک تعاون نہیں کر رہے، اٹلی نے کوئی مدد نہیں کی اور اسپین کا رویہ انتہائی مایوس کن رہا ہے۔

یہ بیانات ایران کے ساتھ جاری تنازع پر امریکہ اور یورپ کے درمیان بڑھتی ہوئی خلیج کی عکاسی کرتے ہیں۔ امریکہ نے ایران کے خلاف کارروائی کا آغاز نیٹو کے بیشتر اتحادیوں کو اعتماد میں لیے بغیر کیا۔ جرمن حکومت کے ترجمان کے مطابق برلن کو ابتدائی حملوں سے قبل بریفنگ دی گئی تھی تاہم یورپی ممالک نے براہ راست شمولیت سے گریز کرتے ہوئے سفارتی حل پر زور دینے کی پالیسی اپنائی ہے۔

جرمن چانسلر فریڈرک مرز کی جانب سے اس ہفتے ٹرمپ کی حکمت عملی پر تنقید اور ایران کے معاملے پر امریکی پوزیشن کو تذلیل قرار دینے کے بعد واشنگٹن اور برلن کے تعلقات میں کشیدگی نمایاں ہوئی ہے۔

امریکی محکمہ دفاع کے اعداد و شمار کے مطابق جرمنی میں 36 ہزار 400، اٹلی میں 12 ہزار 600 اور اسپین میں 3 ہزار 800 امریکی فوجی تعینات ہیں۔ یہ پیش رفت نیٹو اتحادیوں کے کردار پر ٹرمپ کے تحفظات اور اتحاد کے حوالے سے ان کے حالیہ بیانات کے تناظر میں انتہائی اہمیت اختیار کر گئی ہے۔

یورپی حکومتوں نے امریکی آپریشنز کے لیے محدود حد تک فوجی انفراسٹرکچر اور فضائی اڈوں تک رسائی تو دی ہے تاہم کسی بھی جارحانہ کارروائی میں براہ راست حصہ لینے سے انکار کر دیا ہے۔ واشنگٹن اور برلن کے درمیان پیدا ہونے والی یہ تازہ کشیدگی ٹرمپ کے دوبارہ اقتدار میں آنے کے بعد دونوں ممالک کے تعلقات میں اب تک کا سب سے بڑا تناؤ ہے۔