ایران: بارودی سرنگیں ناکارہ بنانے کے دوران 14 فوجی ہلاک

ایران کے شمال مغربی صوبے زنجان میں ناکارہ بارودی مواد کو تلف کرنے کے دوران ہونے والے ایک دھماکے میں 14 فوجی جاں بحق ہو گئے۔ مقامی میڈیا کے مطابق یہ واقعہ جمعہ کے روز پیش آیا۔

ایرانی پاسداران انقلاب کے حوالے سے فارس نیوز ایجنسی نے رپورٹ کیا کہ دشمن کی جانب سے فضائی حملوں میں کلسٹر بموں اور فضائی بارودی سرنگوں کے استعمال کے بعد صوبہ زنجان کا تقریباً 1200 ہیکٹر زرعی رقبہ بارودی مواد سے آلودہ ہو گیا تھا۔

پاسداران انقلاب کے ماہرین اس علاقے کو کلیئر کرنے کے مشن پر مامور تھے اور اب تک 15 ہزار سے زائد بارودی اشیاء کو ناکارہ بنا چکے ہیں۔ تاہم، جمعہ کو جاری آپریشن کے دوران پیش آنے والے ایک افسوسناک واقعے میں 14 اہلکار شہید جبکہ 2 زخمی ہو گئے۔

ایران ماضی میں امریکہ اور اسرائیل پر کلسٹر گولہ بارود کے استعمال کا الزام عائد کرتا رہا ہے۔ یہ ہتھیار فضا میں پھٹ کر چھوٹے بم بکھیر دیتے ہیں، جن میں سے کئی ناکارہ رہ جاتے ہیں اور دہائیوں تک انسانی جانوں کے لیے خطرہ بنے رہتے ہیں۔ دوسری جانب اسرائیل بھی ایران پر اپنے شہروں پر میزائل حملوں میں اسی طرح کے ہتھیار استعمال کرنے کا الزام لگاتا ہے۔

قابل ذکر بات یہ ہے کہ ایران، اسرائیل اور امریکہ ان 100 سے زائد ممالک میں شامل نہیں ہیں جنہوں نے 2008 کے کلسٹر منیشنز کنونشن پر دستخط کیے ہیں۔ یہ عالمی معاہدہ کلسٹر ہتھیاروں کے استعمال، منتقلی، تیاری اور ذخیرہ اندوزی پر مکمل پابندی عائد کرتا ہے۔