یمن کے ساحل کے قریب آئل ٹینکر اغوا، صومالیہ کی جانب گامزن

یمن کے ساحل کے قریب خلیج عدن میں نامعلوم حملہ آوروں نے ایک آئل ٹینکر کو ہائی جیک کر کے صومالیہ کی جانب موڑ دیا ہے۔ یمنی کوسٹ گارڈ کے مطابق یہ واقعہ ہفتے کے روز شبوہ صوبے کے قریب پیش آیا جہاں مسلح افراد نے آئل ٹینکر یوریکا پر دھاوا بول کر اس کا کنٹرول سنبھال لیا۔

یمنی حکومت کے زیر انتظام کوسٹ گارڈ نے واقعے کی تحقیقات کا عزم ظاہر کیا ہے۔ حکام کا کہنا ہے کہ ٹینکر کی لوکیشن کا تعین کر لیا گیا ہے اور عملے کی حفاظت کو یقینی بنانے اور جہاز کو بازیاب کرانے کے لیے ضروری اقدامات کیے جا رہے ہیں۔ تاہم کوسٹ گارڈ نے عملے کی تعداد یا شہریت کے بارے میں کوئی تفصیلات فراہم نہیں کیں۔

میری ٹائم ٹریفک ویب سائٹ کے مطابق ٹوگو کے پرچم بردار اس آئل ٹینکر کو آخری بار مارچ کے آخر میں متحدہ عرب امارات کی بندرگاہ فجیرہ میں دیکھا گیا تھا۔

صومالیہ کے ساحلی علاقوں میں سمندری قزاقی کے واقعات 2011 میں اپنے عروج پر تھے، تاہم بین الاقوامی بحری دستوں کی تعیناتی کے بعد ان میں نمایاں کمی آئی تھی۔ یورپی یونین کے بحری مشن آپریشن اٹلانٹا کے اعداد و شمار کے مطابق گزشتہ چند ہفتوں کے دوران خطے میں حملوں کی شرح میں ایک بار پھر اضافہ دیکھا گیا ہے۔

اپریل کے اواخر میں سمندری تحفظ کے ادارے نے تین حملوں کی تصدیق کی تھی۔ اگرچہ 28 فروری سے خطے میں شپنگ کا عمل متاثر ہے، تاہم تاحال اس بات کے کوئی شواہد نہیں ملے کہ ہفتے کے روز پیش آنے والا یہ واقعہ موجودہ علاقائی کشیدگی سے منسلک ہے۔ گزشتہ ماہ بھی صومالیہ کی ریاست پنٹ لینڈ کی بندرگاہ گراکاڈ سے تعلق رکھنے والے قزاقوں کے ایک نئے گروہ نے خلیج عدن میں ایک ٹینکر کو قبضے میں لیا تھا۔