جنوبی لبنان میں اسرائیلی فضائی حملے، جنگ بندی کے باوجود 7 افراد جاں بحق

لبنان کے جنوبی علاقوں میں جنگ بندی کے باوجود اسرائیلی فورسز کے تازہ حملوں میں کم از کم سات افراد جاں بحق ہو گئے ہیں۔ سرکاری خبر رساں ادارے نیشنل نیوز ایجنسی کے مطابق صفد البتیخ کے قصبے میں فضائی حملے کے دوران تین افراد اپنی جانوں سے ہاتھ دھو بیٹھے۔

ٹائر کے قریب کیے گئے ایک اور فضائی حملے میں تین افراد ہلاک ہوئے جن میں دو شامی اور ایک مصری شہری شامل ہیں۔ اسی علاقے میں موٹر سائیکل پر کیے گئے ڈرون حملے میں ایک اور شخص کے ہلاک ہونے کی بھی تصدیق کی گئی ہے۔

اسرائیلی فوج نے جنوبی لبنان کے گیارہ قصبوں اور دیہات کے رہائشیوں کو فوری انخلا کی تنبیہ جاری کرتے ہوئے انہیں کم از کم ایک ہزار میٹر دور کھلے مقامات پر منتقل ہونے کا حکم دیا ہے۔ اسرائیلی حکام کا کہنا ہے کہ یہ کارروائیاں حزب اللہ کی جانب سے جنگ بندی معاہدے کی مبینہ خلاف ورزی کے جواب میں کی جا رہی ہیں۔

اسرائیلی فوج جنوبی لبنان کے سرحدی علاقوں میں دس کلومیٹر گہرائی تک موجود ہے جسے یلو لائن کا نام دیا گیا ہے۔ وہاں اسرائیلی فوجی عمارتوں کو دھماکوں سے اڑا رہے ہیں اور گھروں کو تباہ کر رہے ہیں۔ لبنان کی وزارت صحت کے مطابق جمعہ کے روز بھی جنوبی لبنان میں اسرائیلی حملوں کے نتیجے میں تیرہ افراد لقمہ اجل بنے تھے۔

دو مارچ سے جاری اسرائیلی جارحیت میں اب تک چھبیس سو سے زائد افراد ہلاک اور سولہ لاکھ سے زائد نقل مکانی پر مجبور ہو چکے ہیں۔ صدر ڈونلڈ ٹرمپ کی جانب سے اعلان کردہ جنگ بندی کے باوجود اسرائیل کو یہ حق حاصل ہے کہ وہ کسی بھی متوقع یا جاری حملے کے خلاف کارروائی کر سکے۔ اسرائیلی فوج نے مقامی آبادی کو متنبہ کیا ہے کہ وہ اپنے گھروں کو واپس نہ لوٹیں کیونکہ فوجی آپریشن تاحال جاری ہے۔