ایران کے ساحلی شہر سریک کے قریب کارگو جہاز پر حملہ، برطانوی میری ٹائم ایجنسی کی تصدیق

ایران کے ساحلی شہر سیرک کے مغرب میں ایک کارگو جہاز پر چھوٹی کشتیوں کے ذریعے حملے کی اطلاعات موصول ہوئی ہیں۔ برطانوی میری ٹائم ٹریڈ آپریشنز کے مطابق یہ واقعہ آبنائے ہرمز کے قریب پیش آیا ہے۔

ادارے کا کہنا ہے کہ یہ حملہ سیرک شہر سے تقریباً 11 سمندری میل کے فاصلے پر کیا گیا۔ ابتدائی رپورٹوں کے مطابق جہاز کا عملہ مکمل طور پر محفوظ ہے اور واقعے کے نتیجے میں کسی قسم کے ماحولیاتی نقصان کی اطلاع نہیں ملی ہے۔

حملے کا نشانہ بننے والے جہاز پر موجود سامان اور حملہ آوروں کی شناخت کے حوالے سے تاحال کوئی تفصیلات جاری نہیں کی گئیں۔ برطانوی حکام نے علاقے سے گزرنے والے دیگر بحری جہازوں کو محتاط رہنے اور کسی بھی مشکوک سرگرمی کی فوری اطلاع دینے کی ہدایت کی ہے۔

برطانوی میری ٹائم ٹریڈ آپریشنز نے ایک ایڈوائزری نوٹ جاری کرتے ہوئے آبنائے ہرمز اور اس کے گردونواح کے پانیوں میں سیکیورٹی کی صورتحال کو انتہائی حساس قرار دیا ہے۔

نگرانی کرنے والے ادارے کو ایک نارتھ باؤنڈ بلک کیریئر کے کپتان کی جانب سے موصول ہونے والے پیغام میں بتایا گیا کہ متعدد چھوٹی کشتیوں نے جہاز کو حملے کا نشانہ بنایا۔ حکام نے تصدیق کی ہے کہ عملہ اب بھی محفوظ مقام پر موجود ہے۔