نیویارک کے سابق میئر روڈی جولیانی کی حالت تشویشناک، ہسپتال منتقل

نیویارک کے سابق میئر اور امریکہ کے معروف سیاست دان روڈی جولیانی کی طبیعت اچانک بگڑنے کے بعد انہیں ہسپتال منتقل کر دیا گیا ہے۔ ان کے ترجمان ٹیڈ گڈمین کے مطابق اکیاسی سالہ جولیانی کی حالت تشویشناک مگر مستحکم ہے تاہم ان کی بیماری کی نوعیت کے بارے میں تفصیلات ظاہر نہیں کی گئیں۔

ترجمان نے سوشل میڈیا پلیٹ فارم ایکس پر اپنے پیغام میں کہا کہ روڈی جولیانی ایک فائٹر ہیں جنہوں نے زندگی کے ہر چیلنج کا ڈٹ کر مقابلہ کیا ہے اور وہ اس وقت بھی اسی عزم کے ساتھ اپنی صحت کی جنگ لڑ رہے ہیں۔ ترجمان نے عوام سے ان کی جلد صحت یابی کے لیے دعا کی اپیل کی ہے۔ نیویارک ٹائمز کی رپورٹ کے مطابق جولیانی اس وقت فلوریڈا کے ایک ہسپتال میں زیر علاج ہیں۔

روڈی جولیانی کو نائن الیون کے دہشت گردانہ حملوں کے بعد نیویارک شہر کی قیادت کرنے پر امریکہ کا میئر قرار دیا گیا تھا۔ اپنے کیریئر کے اوائل میں وہ مافیا کے خلاف سخت کارروائیوں اور قانونی جنگ لڑنے والے پراسیکیوٹر کے طور پر مشہور ہوئے تھے۔

تاہم حالیہ برسوں میں انہیں کئی قانونی اور سیاسی مشکلات کا سامنا رہا ہے۔ سال دو ہزار تیئس میں ایک وفاقی جیوری نے انہیں دو انتخابی ورکرز کو بدنام کرنے پر ایک سو اڑتالیس ملین ڈالر جرمانہ ادا کرنے کا حکم دیا تھا۔ جولیانی نے دو ہزار بیس کے صدارتی انتخابات کے دوران ڈونلڈ ٹرمپ کی قانونی ٹیم میں شامل ہو کر ان کا بھرپور دفاع کیا تھا تاہم بعد ازاں ان پر انتخابی نتائج تبدیل کرنے کی کوششوں کے الزامات بھی عائد ہوئے۔

ان قانونی پیچیدگیوں کے نتیجے میں جولیانی کو نیویارک اور واشنگٹن میں وکالت کے لائسنس سے محروم کر دیا گیا تھا۔ ایریزونا میں انتخابی معاملات سے متعلق فوجداری مقدمات کا سامنا کرنے والے روڈی جولیانی کو گزشتہ نومبر میں ڈونلڈ ٹرمپ نے صدارتی معافی دی تھی۔

سابق صدر ڈونلڈ ٹرمپ نے اتوار کے روز اپنے بیان میں جولیانی کو ایک حقیقی جنگجو اور نیویارک کا بہترین میئر قرار دیا۔ ٹرمپ نے کہا کہ یہ المیہ ہے کہ ان کے ساتھ بدترین سلوک کیا گیا، انہوں نے دعویٰ کیا کہ جولیانی ہر معاملے میں حق بجانب تھے۔