آبنائے ہرمز میں جنوبی کوریا کے بحری جہاز میں دھماکہ اور آتشزدگی، حملے کا خدشہ

آبنائے ہرمز میں جنوبی کوریا کی شپنگ کمپنی ایچ ایم ایم کے ایک جہاز میں پیر کے روز پراسرار دھماکے اور آتشزدگی کا واقعہ پیش آیا ہے۔ جنوبی کوریائی وزارت خارجہ نے تصدیق کی ہے کہ پاناما کے پرچم بردار کارگو جہاز ایچ ایم ایم نامو کے انجن روم میں آگ لگی۔

جنوبی کوریا کی سرکاری خبر رساں ایجنسی یونہاپ کے مطابق حکام اس پہلو کا جائزہ لے رہے ہیں کہ آیا یہ جہاز کسی حملے کا نشانہ بنا تھا۔ واقعے میں خوش قسمتی سے کوئی جانی نقصان نہیں ہوا اور حکام آگ لگنے کی حتمی وجوہات کا تعین کرنے کے لیے تحقیقات کر رہے ہیں۔

کمپنی نے بتایا ہے کہ جہاز پر عملے کے 24 ارکان سوار تھے جن میں چھ جنوبی کوریائی شہری بھی شامل ہیں۔ جنوبی کوریا کی وزارت خارجہ نے اپنے بیان میں کہا ہے کہ حکومت آبنائے ہرمز میں اپنے جہازوں اور عملے کی حفاظت کو یقینی بنانے کے لیے متعلقہ ممالک کے ساتھ قریبی رابطے میں ہے اور تمام ضروری اقدامات اٹھائے جا رہے ہیں۔

ادھر خطے میں کشیدگی کے دوران امریکی فوج نے اطلاع دی ہے کہ ان کے دو گائیڈڈ میزائل ڈسٹرائیر خلیج میں داخل ہوئے ہیں تاکہ ایرانی ناکہ بندی کو ناکام بنایا جا سکے۔ امریکی فوج کے مطابق دو امریکی تجارتی جہازوں نے کامیابی کے ساتھ آبنائے ہرمز سے گزر کر اپنا سفر مکمل کیا ہے۔

یہ پیشرفت ایک ایسے وقت میں ہوئی ہے جب ایران نے دعویٰ کیا تھا کہ اس نے ایک امریکی جنگی جہاز کو خلیج میں داخل ہونے سے روک دیا ہے۔ تاہم امریکی سینٹ کام نے ایرانی دعوے کی تردید کی ہے۔ سیول حکومت کے مطابق اس وقت 26 جنوبی کوریائی جہاز اس علاقے میں پھنسے ہوئے ہیں۔