متحدہ عرب امارات: فجیرہ آئل زون پر ڈرون حملہ، ایرانی میزائل فضا میں ناکارہ

متحدہ عرب امارات کے اہم آئل انڈسٹری زون میں پیر کے روز ڈرون حملے کے نتیجے میں آگ بھڑک اٹھی۔ حکام کے مطابق یہ حملہ ایران کی جانب سے کیا گیا۔ اسی دوران خلیجی ریاست کی فوج نے اپنی سمندری حدود میں ایران کی جانب سے داغے گئے تین میزائلوں کو فضا میں ہی تباہ کر دیا جبکہ چوتھا میزائل سمندر میں جا گرا۔

فجیرہ میڈیا آفس کے جاری کردہ بیان کے مطابق سول ڈیفنس کی ٹیموں نے فوری طور پر جائے وقوعہ پر پہنچ کر آگ بجھانے کا عمل شروع کیا۔ اس حملے میں تین بھارتی شہری معمولی زخمی ہوئے جنہیں طبی امداد کے لیے ہسپتال منتقل کر دیا گیا ہے۔

متحدہ عرب امارات کی وزارت دفاع نے سماجی رابطے کی ویب سائٹ ایکس پر تصدیق کی ہے کہ ان کی مسلح افواج نے تین میزائلوں کو مار گرایا ہے۔ ایرانی خبر رساں اداروں کے مطابق ایرانی پاسداران انقلاب کی بحریہ نے ایک نقشہ جاری کیا ہے جس میں آبنائے ہرمز کے قریب ایرانی کنٹرول کے علاقوں میں توسیع دکھائی گئی ہے، جس میں فجیرہ اور خور فکان کی بندرگاہیں اور ام القوین کا ساحلی علاقہ بھی شامل ہے۔

یہ ڈرون حملہ ایسے وقت میں ہوا ہے جب آٹھ اپریل سے واشنگٹن اور تہران کے درمیان پاکستان کی ثالثی میں ہونے والی جنگ بندی کے بعد خطے میں نسبتاً سکون قائم تھا۔ اس سے قبل خلیجی خطے میں دو ماہ سے زائد عرصے تک شدید کشیدگی برقرار رہی تھی جس کے دوران متحدہ عرب امارات نے ہزاروں ڈرون اور میزائلوں کو تباہ کرنے کا دعویٰ کیا تھا۔

پیر کے روز متحدہ عرب امارات کے حکام نے دبئی اور ابوظہبی میں موبائل فون الرٹس جاری کیے جن میں شہریوں کو میزائل حملوں کے ممکنہ خطرے سے خبردار کیا گیا۔ فجیرہ کے توانائی کے انفراسٹرکچر کو نشانہ بنائے جانے کا یہ پہلا واقعہ نہیں ہے۔ اس سے قبل چودہ مارچ کو بھی فجیرہ کی بندرگاہ پر ڈرون حملہ ہوا تھا جس سے آگ لگ گئی تھی اور تیل کی ترسیل کا عمل جزوی طور پر معطل ہو گیا تھا۔

فجیرہ کی بندرگاہ متحدہ عرب امارات کے لیے تیل کی برآمدات کے حوالے سے انتہائی اہمیت کی حامل ہے۔ یہ ابوظہبی کروڈ آئل پائپ لائن کا آخری مقام ہے جو خشکی کے علاقوں سے تیل خلیج اومان تک لاتی ہے اور آبنائے ہرمز سے گزرنے کی ضرورت کو ختم کرتی ہے۔ اس سہولت کی بدولت متحدہ عرب امارات عالمی منڈیوں میں تیل کی سپلائی جاری رکھنے میں کامیاب رہا ہے جبکہ آبنائے ہرمز مسلسل خطرے کی زد میں ہے۔