غیر قانونی تارکین وطن کا معاملہ: امریکا کی چین پر ویزا پابندیاں عائد کرنے کی دھمکی

واشنگٹن کی جانب سے چین کو خبردار کیا گیا ہے کہ اگر بیجنگ نے غیر قانونی طور پر امریکہ میں مقیم اپنے شہریوں کی واپسی کے عمل میں تعاون نہ بڑھایا تو واشنگٹن سفری پابندیاں سخت کرنے پر مجبور ہوگا۔ امریکی انتظامیہ کے ایک سینئر عہدیدار نے خبر رساں ادارے کو بتایا کہ چین کی جانب سے اپنے شہریوں کی واپسی میں سستی برتی جا رہی ہے جس پر امریکہ نے سخت برہمی کا اظہار کیا ہے۔

یہ دھمکی صدر ڈونلڈ ٹرمپ کے چودہ اور پندرہ مئی کو متوقع دورہ بیجنگ سے چند روز قبل سامنے آئی ہے۔ توقع ہے کہ صدر ٹرمپ اپنے چینی ہم منصب شی جن پنگ کے ساتھ ملاقاتوں میں جلاوطنی کے اس مسئلے کو خصوصی طور پر اٹھائیں گے۔ ٹرمپ انتظامیہ کے لیے یہ دورہ انتہائی اہم ہے کیونکہ وہ نومبر میں ہونے والے وسط مدتی انتخابات سے قبل چین سے تجارتی رعایتیں حاصل کرنے کے خواہشمند ہیں۔

امریکی عہدیدار کا کہنا ہے کہ چین طویل عرصے سے ہزاروں ایسے شہریوں کو واپس لینے میں مزاحمت کر رہا ہے جن کے ویزے کی مدت ختم ہو چکی ہے یا جو غیر قانونی طور پر امریکہ میں داخل ہوئے ہیں۔ اعداد و شمار کے مطابق اس وقت امریکہ میں ایک لاکھ سے زائد غیر قانونی چینی تارکین وطن موجود ہیں، جن میں سے تیس ہزار سے زائد افراد کے خلاف حتمی جلاوطنی کے احکامات جاری ہو چکے ہیں۔ حکام نے ان میں سے پندرہ سو سے زائد افراد کو حراست میں لے رکھا ہے۔

امریکی حکام نے خبردار کیا ہے کہ اگر بیجنگ نے تعاون نہ کیا تو امریکہ ویزا درخواستوں کے ساتھ نقد ضمانتوں کی شرط عائد کرنے، مزید ویزوں کے اجراء پر پابندی لگانے اور سرحد پر داخلے روکنے جیسے اقدامات پر غور کر سکتا ہے۔ عہدیدار نے مزید کہا کہ چینی حکومت کی خاموشی قانون کی پاسداری کرنے والے چینی شہریوں کے لیے مستقبل کے سفر کو خطرے میں ڈال سکتی ہے۔

چین کا موقف رہا ہے کہ وہ غیر قانونی ہجرت کے خلاف ہے اور اسے ایک ایسا بین الاقوامی مسئلہ قرار دیتا ہے جس کے لیے ممالک کے درمیان تعاون ضروری ہے۔ تاہم امریکی حکام کا الزام ہے کہ بیجنگ جلاوطنی کے عمل کو سست روی کا شکار کرتا ہے تاکہ اس معاملے کو واشنگٹن کے خلاف دباؤ کے حربے کے طور پر استعمال کیا جا سکے۔ امریکی محکمہ ہوم لینڈ سیکیورٹی نے چین کو ان ممالک کی فہرست میں شامل کر رکھا ہے جو تارکین وطن کی واپسی میں تعاون نہیں کر رہے۔