اوپن اے آئی کے صدر گریگ بروک مین نے کیلیفورنیا میں جاری عدالتی کارروائی کے دوران انکشاف کیا ہے کہ ایلون مسک آرٹیفیشل انٹیلی جنس کمپنی کو منافع بخش ادارے میں تبدیل کرنے کے حامی تھے، تاہم وہ اس عمل کے دوران مکمل کنٹرول حاصل کرنا چاہتے تھے۔ بروک مین کے مطابق مسک کا مقصد اس کنٹرول کے ذریعے 80 ارب ڈالر کی خطیر رقم اکٹھا کرنا تھا تاکہ مریخ پر انسانی بستی بسانے کا خواب شرمندہ تعبیر ہو سکے۔
عدالت میں پیش کردہ بیان کے مطابق اوپن اے آئی سال 2026 میں کمپیوٹنگ وسائل پر 50 ارب ڈالر خرچ کرنے کا منصوبہ رکھتی ہے۔ ایلون مسک نے کمپنی اور اس کے چیف ایگزیکٹو سیم آلٹ مین پر الزام عائد کیا ہے کہ انہیں غیر منافع بخش ادارے کے لیے 3 کروڑ 80 لاکھ ڈالر دینے پر دھوکے سے آمادہ کیا گیا، جبکہ بعد ازاں کمپنی نے اپنے فلاحی مقاصد ترک کر کے منافع کمانے کا راستہ اختیار کر لیا۔
دنیا کے امیر ترین شخص ایلون مسک نے عدالت سے مطالبہ کیا ہے کہ ان کی جانب سے دیے گئے فنڈز کے عوض 150 ارب ڈالر کا ہرجانہ ادا کیا جائے اور سیم آلٹ مین سمیت گریگ بروک مین کو ان کے عہدوں سے برطرف کیا جائے۔ مسک نے فروری 2018 میں اوپن اے آئی کے بورڈ سے علیحدگی اختیار کر لی تھی۔
بروک مین نے عدالت کو بتایا کہ 2017 میں مسک کا ماننا تھا کہ غیر منافع بخش ڈھانچے کے ساتھ جدید اے آئی ماڈلز کی تیاری کے لیے درکار بھاری فنڈز کا حصول ناممکن ہے۔ ایک ہنگامہ خیز اجلاس کے دوران مسک نے مطالبہ کیا کہ کاروباری تجربے کی بنیاد پر انہیں کمپنی میں اکثریتی حصص ملنے چاہئیں اور وہ جب تک چاہیں مکمل اختیار اپنے پاس رکھیں گے۔
عدالتی کارروائی کے دوران ایک دلچسپ واقعہ کا ذکر بھی ہوا جس میں بروک مین نے بتایا کہ اگست 2017 کے ایک اجلاس میں مسک ایک پینٹنگ پر غصے میں آ کر اسے اٹھا کر باہر نکل گئے تھے اور انہوں نے نئے فنڈز کی فراہمی روکنے کی دھمکی دی تھی۔
دوسری جانب اوپن اے آئی کا موقف ہے کہ ایلون مسک کمپنی کی کامیابیوں سے قبل بورڈ چھوڑنے پر مایوسی کا شکار ہیں اور اب دوبارہ کنٹرول حاصل کرنا چاہتے ہیں۔ کمپنی نے الزام لگایا کہ مسک کا یہ مقدمہ دراصل ان کی اپنی اے آئی کمپنی ایکس اے آئی کو فائدہ پہنچانے کی ایک کوشش ہے۔ دستاویزات کے مطابق اسپیس ایکس کے بورڈ نے جنوری میں مسک کے لیے 20 کروڑ سپر ووٹنگ حصص کی منظوری دی ہے، جس کا انحصار مریخ پر 10 لاکھ افراد پر مشتمل مستقل بستی قائم کرنے کے اہداف سے مشروط ہے۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…