خلیج اومان میں امریکی فوج کی ایرانی آئل ٹینکر پر فائرنگ، خطے میں کشیدگی میں اضافہ

خلیج عمان میں امریکی فوج نے ایرانی تیل بردار جہاز کو نشانہ بنایا ہے جس کے بعد خطے میں کشیدگی میں مزید اضافہ ہو گیا ہے۔ ذرائع کے مطابق یہ واقعہ بدھ کے روز پیش آیا جب ایرانی جہاز نے امریکی ناکہ بندی توڑنے کی کوشش کی۔ امریکی فورسز کی جانب سے کی گئی فائرنگ سے جہاز کا ردّر متاثر ہوا ہے۔

یہ کارروائی ایسے وقت میں کی گئی ہے جب واشنگٹن اور تہران کے درمیان جنگ بندی کے لیے مذاکرات جاری ہیں۔ امریکی صدر ڈونلڈ ٹرمپ دو ماہ سے جاری جنگ کے خاتمے کے لیے ایران پر دباؤ بڑھا رہے ہیں۔ امریکی صدر نے سوشل میڈیا پر اپنے پیغام میں دھمکی دی ہے کہ اگر ایران نے مجوزہ معاہدہ قبول نہ کیا تو بمباری کا سلسلہ شروع کر دیا جائے گا جس کی شدت پہلے سے کہیں زیادہ ہوگی۔

صدر ٹرمپ کا کہنا ہے کہ اگر ایران یورینیم کی افزودگی روکنے، پابندیاں اٹھانے، منجمد اثاثے بحال کرنے اور آبنائے ہرمز کو دوبارہ کھولنے جیسی شرائط مان لے تو جنگ کا خاتمہ فوری ممکن ہے۔

ایرانی حکام نے اس صورتحال پر محتاط ردعمل کا اظہار کیا ہے۔ ایرانی ترجمان اسماعیل بقائی نے کہا ہے کہ تہران ماضی میں امریکی تجاویز کو مسترد کر چکا ہے تاہم حالیہ پیشکش کا جائزہ لیا جا رہا ہے۔

یہ حملہ امریکی صدر کی جانب سے آبنائے ہرمز میں تجارتی جہازوں کی حفاظت کے لیے شروع کیے گئے مختصر آپریشن کے معطل ہونے کے بعد ہوا ہے۔ اس مختصر کوشش کے باوجود خطے میں کشیدگی برقرار ہے، جبکہ امریکی فوج نے دعویٰ کیا ہے کہ انہوں نے ان چھ ایرانی کشتیوں کو غرق کر دیا ہے جو شہری جہازوں کے لیے خطرہ بنی ہوئی تھیں۔