ایران اور پاکستان کا ٹیلی فونک رابطہ، علاقائی صورتحال اور سفارتی کوششوں پر تبادلہ خیال

ایرانی وزیر خارجہ عباس عراقچی اور پاکستان کے نائب وزیراعظم و وزیر خارجہ اسحاق ڈار کے درمیان ٹیلی فونک رابطہ ہوا ہے جس میں خطے کی موجودہ صورتحال اور سفارتی کوششوں پر تفصیلی تبادلہ خیال کیا گیا ہے۔

ایرانی وزارت خارجہ کے مطابق دونوں رہنماؤں نے خطے میں رونما ہونے والی حالیہ پیش رفت اور بدلتی ہوئی صورتحال کا جائزہ لیا۔ اس گفتگو کے دوران دونوں ممالک کے وزرائے خارجہ نے اس بات پر اتفاق کیا کہ موجودہ حالات میں باہمی مذاکرات اور سفارتی عمل کو جاری رکھنا انتہائی اہمیت کا حامل ہے۔

اعلامیے کے مطابق دونوں رہنماؤں نے اس عزم کا اظہار کیا کہ خطے کے ممالک کے مابین تعاون کو مزید مستحکم کرنے کی ضرورت ہے۔ یہ رابطہ ایک ایسے وقت میں ہوا ہے جب ایران کی جانب سے جنگ کے خاتمے کے لیے امریکہ کی طرف سے پیش کردہ نئی تجویز کا جائزہ لیا جا رہا ہے جبکہ پاکستان دونوں فریقین کے درمیان دیرپا حل کے لیے ثالثی کی کوششوں میں مصروف ہے۔

امریکی میڈیا کی رپورٹس کے مطابق تہران کسی بھی وقت ثالثوں کے ذریعے امریکی امن تجویز پر اپنا جواب جمع کروا سکتا ہے۔ سی این این کی رپورٹ میں دعویٰ کیا گیا ہے کہ دونوں فریقین جنگ کے فوری خاتمے کے لیے ایک مختصر مفاہمت کی یادداشت پر دستخط کرنے کے قریب پہنچ چکے ہیں۔