اسرائیل کے ساتھ فٹ بال میچ: آئرش کھلاڑیوں کا بائیکاٹ کا مطالبہ

آئرلینڈ کے نامور فٹبالرز، معروف سماجی شخصیات اور فنکاروں نے مطالبہ کیا ہے کہ جمہوریہ آئرلینڈ کی ٹیم اسرائیل کے خلاف شیڈول یوئیفا نیشنز لیگ کا میچ کھیلنے سے انکار کرے۔ فٹبال ایسوسی ایشن آف آئرلینڈ پر اس میچ کے بائیکاٹ کے لیے دباؤ میں مسلسل اضافہ ہو رہا ہے۔

آئرش اسپورٹ فار فلسطین نامی مہم گروپ کی جانب سے ایف اے آئی کو ایک کھلا خط ارسال کیا گیا ہے۔ اس خط میں اسرائیل پر غزہ میں نسل کشی کا الزام عائد کیا گیا ہے اور کہا گیا ہے کہ اسرائیل مقبوضہ فلسطینی علاقوں میں فٹبال ٹیموں کے استعمال کے ذریعے یوئیفا اور فیفا کے قوانین کی خلاف ورزی کر رہا ہے۔ اسرائیل نے ان الزامات کی سختی سے تردید کی ہے۔

یہ مطالبہ 2025 میں ہونے والی ایف اے آئی کی اس ووٹنگ کے تناظر میں سامنے آیا ہے جس میں 93 فیصد اراکین نے یوئیفا سے اسرائیل کو معطل کرنے کا مطالبہ کیا تھا۔ مہم چلانے والوں کا کہنا ہے کہ ایسوسی ایشن کو اب اس فیصلے پر عملی اقدام اٹھانا چاہیے۔

خط پر دستخط کرنے والوں میں لیگ آف آئرلینڈ کے کھلاڑی، آئرلینڈ کے سابق منیجر برائن کیر، سابق ویمن انٹرنیشنل لوئیس کوئن، بینڈ فونٹینز ڈی سی، نی کیپ، کرسٹی مور اور اداکار اسٹیفن ریا شامل ہیں۔ شیمروک روورز کے کپتان اور پی ایف اے آئرلینڈ کے چیئر رابرٹو لوپس نے بھی اس مطالبے کی حمایت کرتے ہوئے کہا ہے کہ انسانی ہمدردی کے معاملات کو کھیلوں کی وابستگیوں پر فوقیت دی جانی چاہیے۔

آئرلینڈ اور اسرائیل کے درمیان میچ 4 اکتوبر کو ڈبلن کے ایویوا اسٹیڈیم میں شیڈول ہے، جبکہ 27 ستمبر کا میچ کسی غیر جانبدار مقام پر کھیلا جانا متوقع ہے۔

یہ معاملہ حکومتی سطح پر بھی زیر بحث ہے۔ آئرش وزیراعظم مائیکل مارٹن کا کہنا ہے کہ میچز کا انعقاد ہونا چاہیے، تاہم انہوں نے غزہ میں اسرائیلی کارروائیوں پر آئرلینڈ کی تنقید اور حماس کے حملوں کی مذمت کا اعادہ بھی کیا۔

ایف اے آئی کے چیف ایگزیکٹو ڈیوڈ کورل کا موقف ہے کہ ایسوسی ایشن اپنے شیڈول کردہ میچز کھیلنے کی پابند ہے، بصورت دیگر اسے پابندیوں کا سامنا کرنا پڑ سکتا ہے جس میں مستقبل کے مقابلوں سے اخراج بھی شامل ہے۔

دوسری جانب حال ہی میں ہونے والے ایک سروے کے مطابق 76 فیصد آئرش فٹبال شائقین اسرائیل کے خلاف میچ کے انعقاد کے مخالف ہیں۔