ڈونلڈ ٹرمپ کا روس اور یوکرین کے درمیان تین روزہ جنگ بندی کا اعلان

امریکی صدر ڈونلڈ ٹرمپ نے سماجی رابطوں کی ویب سائٹ پر اعلان کیا ہے کہ روس اور یوکرین کے درمیان جاری جنگ میں نو مئی سے گیارہ مئی تک تین روزہ جنگ بندی ہوگی۔

ٹرمپ نے اپنے پیغام میں جنگ بندی کی تفصیلات بتاتے ہوئے کہا کہ اس دوران تمام عسکری سرگرمیوں کو مکمل طور پر معطل رکھا جائے گا جبکہ دونوں ممالک کے درمیان ایک ہزار قیدیوں کا تبادلہ بھی اس معاہدے کا حصہ ہوگا۔

امریکی صدر نے کہا کہ یہ درخواست انہوں نے ذاتی طور پر کی تھی اور وہ روسی صدر ولادیمیر پیوٹن اور یوکرینی صدر ولادیمیر زیلنسکی کی جانب سے اس پر رضامندی ظاہر کرنے پر ان کے بے حد مشکور ہیں۔

انہوں نے مزید کہا کہ امید ہے کہ یہ ایک طویل، مہلک اور سخت جنگ کے خاتمے کی ابتدا ثابت ہوگی۔ دوسری جنگ عظیم کے بعد سب سے بڑے تنازع کو ختم کرنے کے لیے مذاکرات جاری ہیں اور ہم ہر گزرتے دن کے ساتھ امن کے قریب تر ہو رہے ہیں۔

اس سے قبل روس نے ہفتے کے روز دوسری جنگ عظیم میں فتح کی یادگار منانے کے لیے دو روزہ یکطرفہ جنگ بندی کا اعلان کیا تھا۔ یوکرین کی جانب سے ماضی میں کہا گیا تھا کہ انہوں نے بھی جنگ بندی کی پیشکش کی تھی تاہم ماسکو نے اسے نظر انداز کر دیا تھا۔