ایران کی ناکہ بندی: امریکی بحریہ نے 57 تجارتی جہازوں کا رخ موڑ دیا

امریکی بحریہ نے بحیرہ عرب میں ایران کے خلاف ناکہ بندی سخت کر دی ہے۔ امریکی سینٹرل کمانڈ (سینٹکوم) کے مطابق اس مقصد کے لیے تین تباہ کن جنگی جہاز یو ایس ایس ٹرکسٹن، یو ایس ایس رافیل پیرالٹا اور یو ایس ایس میسن کو خطے میں تعینات کیا گیا ہے۔

سینٹکوم کی جانب سے جاری کردہ اعداد و شمار کے مطابق اب تک 57 تجارتی جہازوں کا رخ موڑا جا چکا ہے جبکہ چار بحری جہازوں کو ناکارہ بنا دیا گیا ہے تاکہ انہیں ایرانی بندرگاہوں میں داخل ہونے یا وہاں سے نکلنے سے روکا جا سکے۔

امریکی سینٹرل کمانڈ نے سماجی رابطے کی ویب سائٹ ایکس پر اپنے پیغام میں واضح کیا ہے کہ یہ تینوں جنگی جہاز بحیرہ عرب میں گشت کر رہے ہیں تاکہ ناکہ بندی کو یقینی بنایا جا سکے۔

سینٹکوم نے مشرق وسطیٰ میں تعینات ان تینوں ڈسٹرائر جہازوں کی تصاویر بھی جاری کی ہیں جو ناکہ بندی کی کارروائیوں میں حصہ لے رہے ہیں۔ یہ اقدام ایران کے خلاف جاری دباؤ کی حکمت عملی کا حصہ قرار دیا جا رہا ہے۔