جرمنی کی جانب سے امریکی ٹوماہاک میزائلوں کی خریداری کے لیے کوششیں دوبارہ شروع

جرمنی نے ایک بار پھر امریکا سے ٹوما ہاک کروز میزائل خریدنے کی کوششیں تیز کر دی ہیں۔ فنانشل ٹائمز کی رپورٹ کے مطابق برلن انتظامیہ اس بات کی خواہشمند ہے کہ ٹرمپ حکومت ٹوما ہاک میزائلوں کے ساتھ ساتھ انہیں ٹائفون گراؤنڈ لانچرز کی فروخت پر بھی آمادہ ہو جائے۔

ایران کے معاملے پر امریکا اور جرمنی کے درمیان سفارتی خلیج میں اضافہ ہوا ہے جس نے یورپ اور امریکا کے مابین ٹرانس اٹلانٹک تعلقات پر ایک نئی بحث چھیڑ دی ہے۔ جرمن چانسلر فریڈرک مرز نے گزشتہ ہفتے واشنگٹن پر تنقید کرتے ہوئے کہا کہ تہران کے ساتھ معاہدہ نہ کر سکنے پر امریکا کو ہزیمت اٹھانا پڑی ہے اور صدر ٹرمپ کے پاس ایران کے حوالے سے کوئی واضح حکمت عملی موجود نہیں ہے۔

اس کشیدگی کے تناظر میں صدر ڈونلڈ ٹرمپ نے جرمنی میں تعینات پانچ ہزار امریکی فوجیوں بشمول ولزیک میں موجود اسٹرائیکر بریگیڈ کو واپس بلانے کا اعلان کیا ہے۔ یہ اقدام پہلی بار 2020 میں ان کی صدارت کے دوران تجویز کیا گیا تھا۔ ادھر جرمنی نے بحیرہ روم میں اپنے بحری جہاز روانہ کیے ہیں، تاہم برلن کا موقف ہے کہ یہ جہاز صرف دشمنی ختم ہونے کے بعد صفائی کے آپریشنز میں حصہ لیں گے۔

امریکی کانگریس کے ریپبلکن ارکان راجر وِکر اور مائیک راجرز نے امریکی فوجیوں کے انخلا پر شدید تشویش کا اظہار کیا ہے۔ تجزیہ کاروں کا کہنا ہے کہ اس اقدام سے جرمنی میں امریکی فوجیوں کی تعداد یوکرین پر روسی حملے سے پہلے والی سطح پر آ جائے گی۔

جرمن حکومت نے پیر کے روز واضح کیا کہ واشنگٹن نے 2026 سے جرمنی میں ٹوما ہاک کروز میزائل اور ایس ایم سکس میزائل سسٹم سے لیس بٹالین کی تعیناتی کے منصوبے کو حتمی طور پر منسوخ نہیں کیا ہے۔ چانسلر آفس کے ترجمان کا کہنا ہے کہ موجودہ صورتحال یورپ اور جرمنی کے لیے اپنے دفاعی نظام کی تیاری تیز کرنے کی ضرورت کو اجاگر کرتی ہے۔

جرمنی تاحال امریکی عسکری حکمت عملی کا مرکز ہے جہاں تقریباً 36 ہزار امریکی فوجی تعینات ہیں۔ ریمسٹین ایئر بیس، جو یورپ میں امریکی فوج کا سب سے بڑا مرکز ہے، لاجسٹکس اور ڈرون آپریشنز کے لیے کلیدی حیثیت رکھتا ہے۔ اس کے علاوہ لینڈسٹوہل ریجنل میڈیکل سینٹر بھی ایران تنازع سے منسلک امریکی اہلکاروں کے علاج کے لیے ایک اہم سہولت فراہم کر رہا ہے۔