برطانوی پیرا ٹروپرز کی ہنٹا وائرس کے مشتبہ کیس کے پیشِ نظر ٹرسٹن ڈا کونا میں ہنگامی لینڈنگ

برطانیہ کے زیر انتظام دنیا کے دور افتادہ ترین علاقے ٹرسٹن ڈا کونا میں ہینٹا وائرس کے مشتبہ کیس کی تصدیق کے بعد برطانوی فوج کے پیرا ٹروپرز نے طبی عملے اور امدادی سامان کے ہمراہ پیراشوٹ کے ذریعے علاقے میں لینڈنگ کی ہے۔ یہ اپنی نوعیت کا پہلا واقعہ ہے جس میں برطانوی فوج نے انسانی بنیادوں پر طبی امداد پہنچانے کے لیے پیراشوٹ کا استعمال کیا ہے۔

برطانوی سولہویں ایئر اسالٹ بریگیڈ کے چھ پیرا ٹروپرز اور دو ملٹری کلینیشنز نے آر اے ایف اے چار سو ایم طیارے سے چھلانگ لگائی۔ یہ طیارہ برطانیہ کے آکسفورڈ شائر میں واقع برائز نورٹن بیس سے اڑان بھرنے کے بعد ایسنشن آئی لینڈ پہنچا اور وہاں سے مزید تین ہزار کلومیٹر کا سفر طے کر کے ٹرسٹن ڈا کونا تک پہنچا۔ پرواز کے دوران آر اے ایف وائجر طیارے کی مدد سے فضا میں ایندھن بھرنے کا عمل بھی مکمل کیا گیا۔

طبی امداد کا یہ مشن بنیادی طور پر ایک برطانوی شہری کی زندگی بچانے کے لیے روانہ کیا گیا جو ایک کروز شپ پر سوار تھا اور اس جہاز پر ہینٹا وائرس کا پھیلاؤ دیکھا گیا تھا۔ یہ جہاز تیرہ سے پندرہ اپریل کے دوران جزیرے پر لنگر انداز ہوا تھا۔ عالمی ادارہ صحت کے مطابق متاثرہ شخص میں اٹھائیس اپریل کو علامات ظاہر ہوئیں، جس کے بعد وہ قرنطینہ میں ہے اور اس کی حالت مستحکم بتائی جاتی ہے۔

برطانوی وزارت دفاع کے مطابق جزیرے پر آکسیجن کی فراہمی انتہائی کم سطح پر پہنچ چکی تھی، جس کے پیش نظر پیراشوٹ کے ذریعے طبی عملے اور سامان کی ترسیل ہی واحد راستہ بچا تھا۔ ٹرسٹن ڈا کونا میں تقریباً دو سو افراد آباد ہیں اور یہ جنوبی افریقہ اور جنوبی امریکہ کے درمیان واقع دنیا کا سب سے دور افتادہ جزیرہ ہے جہاں کوئی فضائی پٹی موجود نہیں ہے۔

سولہویں ایئر اسالٹ بریگیڈ کے کمانڈنگ آفیسر بریگیڈیئر ایڈ کارٹ رائٹ کا کہنا ہے کہ فضا سے پیرا ٹروپرز اور طبی امداد کی بروقت آمد سے جزیرے کے رہائشیوں کو حوصلہ ملا ہے۔ اس سے قبل سات مئی کو بھی ایک فوجی طیارے کے ذریعے پی سی آر ٹیسٹ کٹس ایسنشن آئی لینڈ پہنچائی گئی تھیں جہاں سے ایک اور برطانوی شہری کو طبی انخلاء کے بعد جنوبی افریقہ منتقل کیا گیا تھا۔