ایرانی نوبل انعام یافتہ نرگس محمدی کو طبی امداد کے لیے ہسپتال منتقل کر دیا گیا

ایران کی نوبل انعام یافتہ سماجی کارکن نرگس محمدی کو طبی بنیادوں پر جیل سے ہسپتال منتقل کر دیا گیا ہے۔ نرگس محمدی فاؤنڈیشن کی جانب سے جاری کردہ بیان کے مطابق 54 سالہ نرگس محمدی کو بھاری ضمانت کے عوض ان کی سزا معطل کیے جانے کے بعد تہران کے پارس ہسپتال منتقل کیا گیا ہے۔

نرگس محمدی کو دو ہفتے قبل دل کا دورہ پڑا تھا جس کے بعد ان کے اہل خانہ نے مسلسل مطالبہ کیا تھا کہ انہیں زنجان جیل سے تہران منتقل کیا جائے تاکہ وہ اپنی ذاتی طبی ٹیم کی زیر نگرانی بہتر علاج کروا سکیں۔ اب انہیں ایمبولینس کے ذریعے تہران کے ہسپتال پہنچا دیا گیا ہے جہاں ان کا علاج جاری ہے۔

نرگس محمدی نے خواتین کے حقوق کے لیے جدوجہد اور سزائے موت کے خاتمے کی مہم چلانے پر 2023 میں نوبل امن انعام حاصل کیا تھا۔ انہیں گزشتہ برس دسمبر میں ایک وکیل خسرو علیکردی کی یادگاری تقریب کے دوران اشتعال انگیز بیانات دینے کے الزام میں گرفتار کیا گیا تھا۔ فروری میں انہیں مزید ساڑھے سات سال قید کی سزا سنائی گئی تھی جس پر نوبل کمیٹی نے تہران حکومت سے ان کی فوری رہائی کا مطالبہ کیا تھا۔

فاؤنڈیشن نے ضمانت کی شرائط یا سزا معطلی کی تفصیلات فراہم نہیں کیں۔ تاہم فاؤنڈیشن کا کہنا ہے کہ سزا کی عارضی معطلی کافی نہیں ہے کیونکہ نرگس محمدی کو مستقل اور خصوصی طبی نگہداشت کی ضرورت ہے۔ بیان میں مزید کہا گیا ہے کہ اس بات کو یقینی بنانا ضروری ہے کہ وہ دوبارہ جیل نہ بھیجی جائیں۔