خیبر پختونخوا اور گلگت بلتستان میں 5.3 شدت کے زلزلے کے جھٹکے

خیبر پختونخوا اور گلگت بلتستان کے مختلف علاقوں میں زلزلے کے شدید جھٹکے محسوس کیے گئے ہیں۔ زلزلہ پیما مرکز کے مطابق زلزلے کی شدت ریکٹر اسکیل پر 5 اعشاریہ 3 ریکارڈ کی گئی۔

زلزلے کے جھٹکے گلگت، اسکردو، پٹن، بالاکوٹ اور گردونواح کے علاقوں میں محسوس کیے گئے۔ شہری خوف کے عالم میں گھروں سے باہر نکل آئے اور کلمہ طیبہ کا ورد کرتے رہے۔

محکمہ موسمیات کا کہنا ہے کہ زلزلے کی زیر زمین گہرائی 12 کلو میٹر تھی۔ زلزلے کا مرکز شمال مغربی کشمیر میں گلگت بلتستان سے 84 کلو میٹر شمال مشرق کی جانب واقع تھا۔

ابتدائی اطلاعات کے مطابق زلزلے کے نتیجے میں کسی قسم کے جانی یا مالی نقصان کی کوئی اطلاع موصول نہیں ہوئی ہے۔ انتظامیہ کی جانب سے متاثرہ علاقوں میں صورتحال کی نگرانی کی جا رہی ہے۔