وزیراعظم شہباز شریف کی ارتھ آور 2026 میں بھرپور شرکت کی اپیل

وزیر اعظم محمد شہباز شریف نے عوام سے اپیل کی ہے کہ وہ ارتھ آور کے موقع پر آج رات ساڑھے آٹھ بجے سے ساڑھے نو بجے تک غیر ضروری برقی آلات اور لائٹس بند کرکے ماحولیاتی تحفظ کے عالمی عزم میں اپنا کردار ادا کریں۔

اٹھائیس مارچ دو ہزار چھبیس کو جاری کیے گئے اپنے پیغام میں وزیر اعظم نے کہا کہ ماحولیاتی چیلنجز سے بھرپور اس دور میں ارتھ آور ہمیں یہ یاد دلاتا ہے کہ کرہ ارض کا تحفظ ہم سب کی مشترکہ اور بنیادی ذمہ داری ہے۔

اس سال ارتھ آور کا موضوع گیو این آور فار ارتھ رکھا گیا ہے جس کا مقصد توانائی کا دانشمندانہ استعمال اور موسمیاتی تبدیلیوں کے حوالے سے شعور اجاگر کرنا ہے۔ وزیر اعظم نے زور دیا کہ یہ محض ایک علامتی اقدام نہیں بلکہ غور و فکر کا ایک ایسا موقع ہے جو ہمیں پائیدار اور محفوظ مستقبل کے لیے اپنے عزم کی تجدید کا موقع فراہم کرتا ہے۔

شہباز شریف کا کہنا تھا کہ آج کیے جانے والے فیصلے ہی ہماری آنے والی نسلوں کے مستقبل کا تعین کریں گے۔ انہوں نے مزید کہا کہ وفاقی حکومت موسمیاتی تبدیلیوں اور ماحولیاتی تنزلی سے نمٹنے کے لیے ایک جامع اور لچکدار ترقیاتی ایجنڈے پر عمل پیرا ہے۔

وزیر اعظم نے اس بات پر بھی زور دیا کہ انفرادی سطح پر کیے جانے والے شعوری اقدامات اجتماعی طور پر معاشرے میں نمایاں اور مثبت تبدیلی لانے کا باعث بنتے ہیں۔