قطر نے پاکستانی شہریوں کے لیے ویزا آن ارائیول کی سہولت معطل کر دی

دوحہ میں موجود پاکستانی سفارت خانے نے قطر کا سفر کرنے والے شہریوں کے لیے اہم سفری ہدایت نامہ جاری کر دیا ہے۔ سفارت خانے کے مطابق قطر میں پاکستانیوں کے لیے ویزا آن ارائیول کی سہولت فی الحال معطل کر دی گئی ہے۔

موجودہ صورتحال کے پیش نظر جاری کردہ ایڈوائزری میں واضح کیا گیا ہے کہ پاکستانی شہریوں کو قطر میں داخلے کے لیے روانگی سے قبل ویزا حاصل کرنا لازمی ہوگا۔ بغیر ویزا سفر کرنے والے مسافروں کو مشکلات کا سامنا کرنا پڑ سکتا ہے اور انہیں ملک میں داخلے کی اجازت نہیں دی جائے گی۔

سفارتی حکام نے تاکید کی ہے کہ کسی بھی قسم کی پریشانی سے بچنے کے لیے پاکستانی شہری سفر کا پروگرام بنانے سے پہلے مناسب ویزا کا حصول یقینی بنائیں۔ حکام کا کہنا ہے کہ قطر میں داخلہ اب صرف درست اور پیشگی حاصل کردہ ویزا کی بنیاد پر ہی ممکن ہوگا۔