پاکستان کی امن ثالثی کی عالمی سطح پر پذیرائی ہو رہی ہے، وزیر مملکت

اسلام آباد: وزیر مملکت برائے خزانہ بلال اظہر کیانی نے کہا ہے کہ پاکستان ایران اور امریکہ کے درمیان جاری کشیدگی میں ثالثی کے کردار کے حوالے سے عالمی سطح پر پذیرائی حاصل کر رہا ہے۔

ایک نجی ٹی وی پروگرام میں گفتگو کرتے ہوئے بلال اظہر کیانی نے واضح کیا کہ ملک میں ایندھن کی فراہمی کو ہر صورت یقینی بنایا جا رہا ہے اور تمام متعلقہ وزارتیں باہمی تعاون کے ساتھ صورتحال کی کڑی نگرانی کر رہی ہیں۔

انہوں نے کہا کہ دیگر ممالک کے برعکس پاکستان میں پیٹرول کے حصول کے لیے لمبی قطاریں نہیں ہیں، اور حکومت عوام کو ریلیف فراہم کرنے کے لیے ہر ممکن اقدام اٹھانے کے لیے پرعزم ہے۔ معاشی چیلنجز کا مسلسل جائزہ لیا جا رہا ہے۔

وزیر مملکت نے مزید کہا کہ جنگ کے آغاز کے بعد سے حکومت نے ایسا کوئی قدم نہیں اٹھایا جس سے افراتفری پھیلے۔ انہوں نے بتایا کہ حکومت نے تین ہفتوں تک تیل کی قیمتوں کو کنٹرول میں رکھا اور موجودہ صورتحال کے دوران ڈیزل پر لیوی کو صفر کر دیا ہے۔

بلال اظہر کیانی نے اس عزم کا اعادہ کیا کہ پاکستان معاشی اور سفارتی محاذوں پر مسلسل پیش رفت کر رہا ہے اور بین الاقوامی برادری کی جانب سے پاکستان کے ثالثی کردار کو سراہا جا رہا ہے۔