ایران کا اعلیٰ سطحی وفد مذاکرات کے لیے اسلام آباد پہنچ گیا

اسلام آباد میں ایران اور امریکہ کے درمیان امن مذاکرات کے لیے اہم پیش رفت ہوئی ہے اور ایرانی پارلیمنٹ کے اسپیکر محمد باقر قالیباف کی قیادت میں ایک اعلیٰ سطحی وفد ہفتے کی صبح اسلام آباد پہنچ گیا ہے۔ وفد میں ایرانی وزیر خارجہ عباس عراقچی، ڈیفنس کونسل کے سیکریٹری، مرکزی بینک کے گورنر اور پارلیمنٹ کے متعدد ارکان سمیت سیاسی، عسکری اور اقتصادی امور کے ماہرین شامل ہیں۔

ائیرپورٹ پر ایرانی وفد کا استقبال نائب وزیراعظم اور وزیر خارجہ اسحاق ڈار نے کیا۔ اس موقع پر فیلڈ مارشل سید عاصم منیر، اسپیکر قومی اسمبلی سردار ایاز صادق اور وفاقی وزیر داخلہ محسن نقوی بھی موجود تھے۔ ترجمان دفتر خارجہ کے مطابق نائب وزیراعظم اسحاق ڈار نے امید ظاہر کی ہے کہ دونوں فریقین مذاکرات کو تعمیری انداز میں آگے بڑھائیں گے۔ پاکستان نے تنازع کے پائیدار اور طویل مدتی حل کے لیے سہولت کاری جاری رکھنے کے عزم کا اعادہ کیا ہے۔

دوسری جانب امریکی وفد کی قیادت کے لیے نائب صدر جے ڈی وینس بھی پاکستان روانہ ہو چکے ہیں۔ روانگی سے قبل اپنے بیان میں جے ڈی وینس نے کہا کہ وہ صدر ڈونلڈ ٹرمپ کی ہدایات کے مطابق مذاکرات میں شریک ہو رہے ہیں اور انہیں توقع ہے کہ ایران کے ساتھ بات چیت مثبت نتائج کی حامل ہوگی۔

اسلام آباد میں ہونے والے ان اہم مذاکرات کے لیے امریکی وفد میں نائب صدر جے ڈی وینس کے ہمراہ خصوصی نمائندے اسٹیو وٹکوف اور صدر ٹرمپ کے داماد جیریڈ کشنر بھی شامل ہیں۔ ایران اور امریکہ کے درمیان یہ مذاکرات آج ہفتے کے روز اسلام آباد میں منعقد ہوں گے، جس میں سیکورٹی، سیاسی، عسکری، اقتصادی اور قانونی امور پر تفصیلی بات چیت کی جائے گی۔