اسلام آباد میں سفارتی سرگرمیوں کے پیش نظر سیکیورٹی ہائی الرٹ، ریڈ زون کی حفاظت سخت

اسلام آباد میں جاری سفارتی سرگرمیوں اور امریکہ و ایران کے درمیان مذاکرات کے ممکنہ دوسرے دور کے پیش نظر وفاقی دارالحکومت میں سیکیورٹی ہائی الرٹ کر دی گئی ہے۔ ریڈ زون سمیت تمام حساس مقامات پر سیکیورٹی کے انتظامات مکمل کر لیے گئے ہیں جبکہ پنجاب بھر سے پولیس کی اضافی نفری بھی اسلام آباد طلب کر لی گئی ہے۔

انتظامیہ کے مطابق جڑواں شہروں کے تمام ٹرانسپورٹ ٹرمینلز کو جمعرات کی رات گیارہ بجے سے بند کر دیا گیا ہے۔ ضلعی انتظامیہ کا کہنا ہے کہ جو گاڑیاں پہلے سے راولپنڈی کی جانب سفر کر رہی ہیں، انہیں ضروری کارروائی مکمل ہونے کے بعد متعلقہ ٹرمینلز تک جانے کی اجازت دی جائے گی۔

وائٹ ہاؤس نے عندیہ دیا ہے کہ ایران کے ساتھ مذاکرات کا اگلا دور اسلام آباد میں متوقع ہے۔ ترجمان وائٹ ہاؤس کیرولین لیوٹ نے پریس بریفنگ کے دوران کہا کہ ایران کے ساتھ تعمیری بات چیت جاری ہے اور توقع ہے کہ یہ سلسلہ اسی مقام پر برقرار رہے گا جہاں پہلے مذاکرات ہوئے تھے۔

ترجمان نے واضح کیا کہ امریکہ نے جنگ بندی کے معاہدے میں توسیع کی کوئی درخواست نہیں کی ہے۔ کیرولین لیوٹ نے اس سفارتی عمل میں پاکستان کے مرکزی کردار کو سراہتے ہوئے کہا کہ پاکستان ایران کے ساتھ مذاکرات میں واحد ثالث کا کردار ادا کر رہا ہے۔