شمالی کوریا کا امریکی سرزمین تک مار کرنے والے میزائل انجن کا کامیاب تجربہ

شمالی کوریا کے سربراہ کم جونگ اُن نے ایک طاقتور ٹھوس ایندھن والے راکٹ انجن کے کامیاب تجربے کی نگرانی کی ہے۔ سرکاری خبر رساں ادارے کے مطابق یہ پیش رفت ملک کی تزویراتی عسکری صلاحیتوں کو مزید مستحکم کرنے کے قومی دفاعی منصوبے کا حصہ ہے۔ ماہرین کا کہنا ہے کہ اس تجربے کا مقصد طویل فاصلے تک مار کرنے والے ایسے میزائل تیار کرنا ہے جو ایک سے زائد جوہری وار ہیڈز لے جانے کی صلاحیت رکھتے ہوں۔

سرکاری میڈیا کے مطابق اس نئے تجربے میں انجن نے 2500 کلو نیوٹن کی زبردست تھرسٹ پیدا کی، جو گزشتہ برس ستمبر میں کیے گئے ٹیسٹ کے 1971 کلو نیوٹن کے مقابلے میں کہیں زیادہ ہے۔ دفاعی تجزیہ کاروں کے مطابق ٹھوس ایندھن کے حامل یہ انجن میزائلوں کو فوری فائر کرنے میں مدد دیتے ہیں کیونکہ انہیں لانچ سے قبل طویل تیاری کی ضرورت نہیں ہوتی۔

کوریا انسٹی ٹیوٹ فار نیشنل یونیفکیشن کے تجزیہ کار ہونگ من کا کہنا ہے کہ بڑھتی ہوئی تھرسٹ اس بات کا واضح اشارہ ہے کہ پیانگ یانگ ایسے بین البراعظمی بیلسٹک میزائل تیار کرنے کا ارادہ رکھتا ہے جو دنیا کے کسی بھی کونے کو نشانہ بنا سکیں اور دشمن کے میزائل دفاعی نظام کو ناکام بنا سکیں۔

ماہرین کا ماننا ہے کہ شمالی کوریا پہلے ہی امریکہ تک پہنچنے والے میزائلوں کی ٹیکنالوجی میں مہارت حاصل کر چکا ہے اور اب اس کی توجہ ایک ساتھ متعدد اہداف کو نشانہ بنانے والے میزائلوں پر مرکوز ہے۔ ایسے میزائلوں کا وزن زیادہ ہوتا ہے جس کے لیے انتہائی طاقتور انجن کی ضرورت ہوتی ہے۔

اس پیش رفت کے ساتھ ساتھ کم جونگ اُن نے خصوصی فورسز کے تربیتی مرکز کا دورہ بھی کیا جہاں انہوں نے جوانوں کی مشقوں کا معائنہ کیا۔ سرکاری میڈیا کے مطابق ان مشقوں کا مقصد فوجیوں کی جسمانی اور تکنیکی صلاحیتوں کو جانچنا تھا تاکہ وہ ہر طرح کے حالات میں دشمن کا مقابلہ کرنے کے لیے تیار رہیں۔ شمالی کوریا نے آخری بار اکتوبر 2024 میں بین البراعظمی بیلسٹک میزائل کا تجربہ کیا تھا۔