ایران کا اسرائیلی جنگی طیارہ مار گرانے کا دعویٰ، اسرائیل پر میزائل حملے

ایرانی پاسدارانِ انقلاب نے دعویٰ کیا ہے کہ ان کے فضائی دفاعی نظام نے خلیج فارس کے اوپر ایک جنگی طیارے کو مار گرایا ہے، جبکہ بیک وقت اسرائیل کے متعدد مقامات پر میزائل حملے کیے گئے ہیں۔

ایرانی بحریہ کے مطابق جزیرہ قشم کے قریب ایک لڑاکا طیارے کو نشانہ بنایا گیا، جس کی ویڈیو بھی جاری کر دی گئی ہے۔ پاسدارانِ انقلاب نے یہ دعویٰ بھی کیا ہے کہ امریکی طیارہ بردار بحری جہاز ابراہم لنکن کو کروز میزائلوں سے نشانہ بنایا گیا ہے، اور اس کارروائی کی فوٹیج بھی منظرِ عام پر لائی گئی ہے۔

ایرانی ذرائع کا کہنا ہے کہ میزائل حملوں میں تل ابیب اور ایلات میں واقع اسرائیلی فوجی اڈوں کو نشانہ بنایا گیا، جس کے نتیجے میں تنصیبات کو شدید نقصان پہنچا ہے۔

رپورٹس کے مطابق کچھ میزائل گنجان آباد علاقوں میں گرے جس سے وہاں آگ بھڑک اٹھی۔ ایران نے دعویٰ کیا ہے کہ اسرائیل کا میزائل ڈیفنس سسٹم ان حملوں کو روکنے میں مکمل طور پر ناکام رہا ہے۔

دوسری جانب اسرائیلی حکام کی جانب سے ان حملوں پر تاحال کوئی باضابطہ ردِعمل سامنے نہیں آیا ہے۔