ٹیسلا کی سیلف ڈرائیونگ سافٹ ویئر کو یورپ میں پہلی بار نیدرلینڈز کی منظوری

ڈچ ریگولیٹرز نے ٹیسلا کی سیلف ڈرائیونگ سافٹ ویئر کے استعمال کی منظوری دے دی ہے جس کے تحت شاہراہوں اور شہر کی سڑکوں پر انسانی نگرانی کے ساتھ گاڑی چلائی جا سکے گی۔ یہ یورپ میں الیکٹرک کار بنانے والی کمپنی کے لیے اپنی نوعیت کا پہلا واقعہ ہے اور ٹیسلا اب یورپی یونین کے دیگر ممالک میں بھی ایسی ہی اجازت کی خواہاں ہے۔

ٹیسلا کی ایک ٹریلین ڈالر کی مارکیٹ ویلیو کا بڑا انحصار چیف ایگزیکٹو ایلون مسک کے اس عزم پر ہے کہ مصنوعی ذہانت پر مبنی خودکار ڈرائیونگ سافٹ ویئر اور روبوٹ ٹیکسیاں مستقبل میں آمدنی کا بڑا ذریعہ بنیں گی۔

نیدرلینڈز کے ادارے آر ڈی ڈبلیو نے اٹھارہ ماہ سے زائد کے تجربات اور تجزیے کے بعد فل سیلف ڈرائیونگ سپروائزڈ نامی ٹیکنالوجی کی منظوری دی ہے جو گاڑی کو موڑنے، بریک لگانے اور رفتار بڑھانے کی صلاحیت رکھتی ہے۔ ادارے کا کہنا ہے کہ ڈرائیور اسسٹنس سسٹم کا درست استعمال سڑکوں پر حفاظت میں مثبت کردار ادا کرتا ہے اور وہ اب اس ٹیکنالوجی کو پورے یورپی یونین میں استعمال کرنے کے لیے درخواست جمع کرائیں گے۔

ٹیسلا کو امید ہے کہ اس ٹیکنالوجی کی بدولت یورپ میں گاڑیوں کی فروخت میں اضافہ ہوگا، جہاں گزشتہ کچھ عرصے سے فروخت کی رفتار سست پڑ گئی تھی۔ مارننگ سٹار کے تجزیہ کار سیٹ گولڈسٹین کے مطابق ڈچ اتھارٹی کی جانب سے منظوری کے بعد یورپی صارفین میں اس ٹیکنالوجی کو آزمانے کا رجحان بڑھے گا جس سے آئندہ مہینوں میں فروخت میں بہتری متوقع ہے۔

ٹیسلا نے سماجی رابطے کی ویب سائٹ ایکس پر اعلان کیا ہے کہ وہ جلد ہی نیدرلینڈز میں اس ٹیکنالوجی کا آغاز کر رہے ہیں اور اسے دیگر یورپی ممالک تک پھیلانے کے لیے پرجوش ہیں۔ تاہم ڈچ حکام نے واضح کیا ہے کہ یورپی یونین کے حفاظتی معیارات امریکہ سے زیادہ سخت ہیں، اس لیے یورپی ورژن امریکی ورژن سے مختلف ہوگا۔

نیدرلینڈز میں ٹیسلا کی تقریباً ایک لاکھ گاڑیاں موجود ہیں جو اس سافٹ ویئر کے استعمال کے اہل ہیں۔ دیگر کار ساز کمپنیاں جیسے مرسڈیز، فورڈ اور بی ایم ڈبلیو بھی خودکار ڈرائیونگ ٹیکنالوجی پر کام کر رہی ہیں، تاہم ٹیسلا کی ٹیکنالوجی کو وسیع تر حالات میں استعمال کیا جا سکے گا۔

آر ڈی ڈبلیو اب اس ٹیکنالوجی کی یورپی یونین بھر میں تصدیق کے لیے یورپی کمیشن کو درخواست بھیجے گا۔ اگر یورپی یونین کی کمیٹی میں اسے اکثریت حاصل نہ بھی ہو سکی، تب بھی انفرادی ممالک اپنے طور پر اس کی اجازت دینے کا فیصلہ کر سکتے ہیں۔ ٹیسلا نے گزشتہ ماہ امید ظاہر کی تھی کہ انہیں موسم گرما تک پورے یورپ میں منظوری مل سکتی ہے۔