بحر اوقیانوس میں ہسپانوی پولیس کی بڑی کارروائی، ریکارڈ مقدار میں کوکین برآمد

ہسپانوی پولیس نے بحر اوقیانوس میں ایک کارروائی کے دوران منشیات کی تاریخ کی سب سے بڑی کھیپ پکڑنے کا دعویٰ کیا ہے۔ سول گارڈ کے ذرائع کے مطابق کینری جزائر کے قریب بین الاقوامی پانیوں میں ایک بحری جہاز کو روکا گیا جس سے ممکنہ طور پر چالیس ٹن تک کوکین برآمد ہوئی ہے۔

اس کارروائی کے دوران تقریباً بیس افراد کو حراست میں لیا گیا ہے۔ حکام کا کہنا ہے کہ جہاز کا نچلا حصہ منشیات کی بوریوں سے مکمل طور پر بھرا ہوا تھا جسے ایک تاریخی کامیابی قرار دیا جا رہا ہے۔

ابتدائی معلومات کے مطابق یہ جہاز سیرا لیون کے دارالحکومت فری ٹاؤن سے روانہ ہوا تھا اور اسے لیبیا کے شہر بن غازی پہنچنا تھا۔ تاہم ماہرین کا خیال ہے کہ اس بھاری مقدار کو یورپ میں تقسیم کرنے کے لیے چھوٹے جہازوں کے ذریعے منتقل کیا جانا تھا کیونکہ اتنی بڑی تعداد میں منشیات کی ایک ہی بندرگاہ پر ترسیل مشکوک ہو سکتی تھی۔

ہسپانوی وزیر داخلہ فرنینڈو گرانڈے مارلاسیکا نے میڈرڈ میں میڈیا سے گفتگو کرتے ہوئے تصدیق کی کہ یہ نہ صرف قومی بلکہ بین الاقوامی سطح پر پکڑی جانے والی سب سے بڑی کھیپ میں سے ایک ہے۔ فی الحال عدالتی حکم کے تحت اس کیس کی تحقیقات کو خفیہ رکھا گیا ہے۔

اسپین لاطینی امریکہ سے قریبی تعلقات اور مراکش سے قربت کی وجہ سے یورپ میں منشیات کی سمگلنگ کا اہم ترین داخلی راستہ سمجھا جاتا ہے۔ اس سے قبل جنوری میں دس ٹن اور گزشتہ برس تیرہ ٹن کوکین کی بڑی برآمدگی بھی اسی علاقے میں عمل میں آئی تھی۔

سول گارڈ نے اس آپریشن کی حتمی تفصیلات کی باضابطہ تصدیق سے گریز کیا ہے تاہم جہاز کو کینری جزائر منتقل کر کے مزید تفتیش کا عمل جاری ہے۔