بھارت: مغربی بنگال کے اہم ریاستی انتخابات میں بی جے پی کی کامیابی

بھارتی ریاست مغربی بنگال کے انتخابات میں حکمران جماعت بھارتیہ جنتا پارٹی نے بڑی کامیابی حاصل کرتے ہوئے اپوزیشن کے اہم گڑھ پر قبضہ جما لیا ہے۔ الیکشن کمیشن آف انڈیا کے جاری کردہ ابتدائی نتائج کے مطابق بی جے پی 294 نشستوں پر مشتمل مغربی بنگال اسمبلی میں 124 نشستیں جیت چکی ہے جبکہ 83 پر اسے برتری حاصل ہے۔ حتمی نتائج کا اعلان آج شام تک متوقع ہے۔

یہ کامیابی نریندر مودی کی جماعت کے لیے انتہائی اہم ہے کیونکہ وہ طویل عرصے سے وزیر اعلیٰ ممتا بنرجی کی آل انڈیا ترنمول کانگریس کی حکومت کو ہٹانے کی کوشش کر رہے تھے۔ ممتا بنرجی 2011 سے اقتدار میں ہیں اور مودی کی سخت ترین ناقدین میں شمار ہوتی ہیں۔ بی جے پی اس سے قبل کبھی بھی مغربی بنگال میں حکومت نہیں بنا سکی تھی۔ اپوزیشن جماعتوں کی جانب سے انتخابی عمل پر تنقید کی جا رہی ہے اور ان کا الزام ہے کہ الیکشن کمیشن نے لاکھوں ووٹرز کے نام انتخابی فہرستوں سے خارج کر دیے ہیں۔

مغربی بنگال کے نتائج سے نریندر مودی کی سیاسی پوزیشن مزید مستحکم ہوگی جو اپنی تیسری مدت کے وسط میں ہیں۔ سال 2024 کے قومی انتخابات میں بی جے پی کو حکومت سازی کے لیے علاقائی اتحادیوں کا سہارا لینا پڑا تھا اور اب مودی 2029 میں ریکارڈ چوتھی بار وزارت عظمیٰ کے امیدوار بننے کی تیاری کر رہے ہیں۔

نئی دہلی میں بی جے پی ہیڈکوارٹر سے خطاب کرتے ہوئے وزیر اعظم مودی نے کہا کہ ان نتائج سے ثابت ہوتا ہے کہ مغربی بنگال میں پارٹی کی مقبولیت میں اضافہ ہوا ہے۔ انہوں نے کہا کہ بنگال کی تقدیر کا ایک نیا باب لکھا گیا ہے۔ ممتا بنرجی کی شکست سے اپوزیشن اتحاد کو بھی دھچکا پہنچا ہے جو پہلے ہی علاقائی مفادات کی جنگ کے باعث تقسیم کا شکار ہے۔

دیگر ریاستوں کی صورتحال پر نظر ڈالی جائے تو جنوبی ریاست تامل ناڈو میں معروف فلمی ستارے جوزف وجے کی جماعت تاملگا ویٹری کزگم نے حکمران ڈی ایم کے کو شکست دے دی ہے۔ کیرالہ میں انڈین نیشنل کانگریس کی قیادت میں اپوزیشن نے کمیونسٹ حکومت کا خاتمہ کر دیا ہے جبکہ آسام میں بی جے پی نے مسلسل تیسری بار کامیابی حاصل کر کے اپنی حکومت برقرار رکھی ہے۔