غزہ جانے والے فلوٹیلا میں شامل دو کارکنوں کو اسرائیل نے ملک بدر کر دیا

اسرائیلی حکام نے غزہ کے لیے امداد لے جانے والے عالمی فلوٹیلا میں شامل دو غیر ملکی کارکنوں کو ڈی پورٹ کر دیا ہے۔ اسرائیل کی وزارت خارجہ کے مطابق ہسپانوی شہری سیف ابو کشیک اور برازیل سے تعلق رکھنے والے تھیاگو اویلا کو اتوار کے روز ملک بدر کیا گیا۔

یہ دونوں کارکن بارہ اپریل کو اسپین سے روانہ ہونے والے دوسرے گلوبل صمود فلوٹیلا کا حصہ تھے، جس کا مقصد غزہ پر عائد اسرائیلی ناکہ بندی کو توڑ کر محصورین تک امداد پہنچانا تھا۔ ان افراد کو انتیس اپریل کو بین الاقوامی پانیوں میں حراست میں لے کر اسرائیل منتقل کیا گیا تھا۔

اسرائیلی وزارت خارجہ نے دعوی کیا ہے کہ سیف ابو کشیک پر کسی دہشت گرد تنظیم سے وابستگی جبکہ تھیاگو اویلا پر غیر قانونی سرگرمیوں میں ملوث ہونے کا شبہ تھا۔ تاہم دونوں کارکنوں نے ان الزامات کو مسترد کرتے ہوئے موقف اختیار کیا ہے کہ وہ غزہ کی شہری آبادی کے لیے انسانی ہمدردی کے مشن پر تھے اور بین الاقوامی پانیوں میں ان کی گرفتاری غیر قانونی اقدام ہے۔

غزہ کا انتظام زیادہ تر فلسطینی گروپ حماس کے پاس ہے جسے اسرائیل اور مغرب کے کئی ممالک دہشت گرد تنظیم قرار دیتے ہیں۔ سات اکتوبر دو ہزار تئیس کو حماس کی جانب سے اسرائیل پر کیے گئے حملے کے بعد سے جاری جنگ کے نتیجے میں غزہ کی بڑی آبادی بے گھر ہو چکی ہے اور امدادی اداروں کا کہنا ہے کہ متاثرین تک امداد کی فراہمی انتہائی سست روی کا شکار ہے۔