پیٹر جیکسن کی ‘ٹن ٹن’ کے ساتھ ایڈونچر فلموں کی دنیا میں واپسی

عالمی شہرت یافتہ فلم ساز پیٹر جیکسن نے کانز فلم فیسٹیول کے دوران ایک ماسٹر کلاس میں شرکت کرتے ہوئے ٹنٹن سیریز کی نئی فلم پر کام کرنے کا اعلان کیا ہے۔ یہ فلم اسٹیون اسپیلبرگ کی 2011 میں ریلیز ہونے والی اینیمیٹڈ فلم دی ایڈونچرز آف ٹنٹن کا تسلسل ہوگی۔

پیٹر جیکسن نے انکشاف کیا کہ معاہدے کے تحت ایک فلم اسٹیون اسپیلبرگ کو اور دوسری انہیں بنانی تھی تاہم پندرہ برس گزر جانے کے باوجود وہ اپنی فلم مکمل نہ کر سکے۔ انہوں نے اس تاخیر پر اپنے احساسات کا اظہار کرتے ہوئے کہا کہ وہ اس صورتحال پر کافی شرمندہ ہیں۔

جیکسن نے بتایا کہ وہ فیسٹیول کے دوران بھی اپنے ہوٹل کے کمرے میں اپنی دیرینہ ساتھی فران والش کے ساتھ مل کر اسکرپٹ پر کام کر رہے تھے۔ انہوں نے بیلجیئم کے کارٹونسٹ ہرجے کے تخلیق کردہ کردار ٹنٹن کے ساتھ اپنی گہری وابستگی کا بھی اعادہ کیا۔

کانز میں تقریب کے دوران پیٹر جیکسن کو ان کی شاندار فنی خدمات کے اعتراف میں اعزازی پام ڈی اور سے نوازا گیا۔ ایوارڈ پیش کرنے کے لیے ان کے ساتھ لارڈ آف دی رنگز کے اداکار ایلیا وڈ موجود تھے جنہیں دیکھ کر حاضرین نے کھڑے ہو کر طویل داد دی۔

چونسٹھ سالہ پیٹر جیکسن نے اپنے کیریئر کا آغاز نیوزی لینڈ میں کم بجٹ کی ہارر فلموں سے کیا تھا۔ بعد ازاں انہوں نے لارڈ آف دی رنگز جیسی عظیم الشان تری لوجی بنا کر عالمی سطح پر اپنی شناخت قائم کی، جس نے سترہ اکیڈمی ایوارڈز جیت کر تاریخ رقم کی۔

پیٹر جیکسن نے اپنے فنی سفر کے دوران ہیونلی کریچرز، کنگ کانگ اور دی ہوبٹ جیسی کامیاب فلموں کے علاوہ پہلی جنگ عظیم پر دستاویزی سیریز بھی تخلیق کی ہے۔ ان کا شمار آج ہالی وڈ کے کامیاب ترین ہدایت کاروں میں ہوتا ہے۔