محکمہ موسمیات کی ملک بھر میں مزید بارشوں کی پیش گوئی

محکمہ موسمیات نے ملک بھر میں آئندہ چوبیس گھنٹوں کے دوران تیز ہواؤں اور گرج چمک کے ساتھ بارش کی پیشگوئی کر دی ہے۔ موسمیاتی صورتحال کے پیش نظر محکمہ نے بالائی خیبر پختونخوا اور جنوبی بلوچستان میں کہیں کہیں موسلا دھار بارش کا امکان ظاہر کیا ہے جس سے نشیبی علاقے متاثر ہو سکتے ہیں۔

محکمہ موسمیات کے مطابق بلوچستان، خیبر پختونخوا، گلگت بلتستان، کشمیر اور اسلام آباد کے بیشتر علاقوں میں بارش متوقع ہے جبکہ پنجاب اور سندھ کے چند مقامات پر بھی گرج چمک کے ساتھ بوندا باندی کا امکان ہے۔ اس دوران کچھ مقامات پر ژالہ باری اور آسمانی بجلی گرنے کے واقعات بھی پیش آ سکتے ہیں۔

موسمیاتی تبدیلیوں کے باعث پنجاب، خیبر پختونخوا اور سندھ میں کھڑی فصلوں کو نقصان پہنچنے کا خدشہ ہے جبکہ بالائی خیبر پختونخوا، گلگت بلتستان اور کشمیر کے حساس علاقوں میں لینڈ سلائیڈنگ کا خطرہ بھی موجود ہے۔ سیاحوں اور مسافروں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی گئی ہے۔

اسلام آباد اور گردونواح میں مطلع ابر آلود رہے گا اور تیز ہواؤں کے ساتھ بارش کا امکان ہے۔ خیبر پختونخوا کے اضلاع چترال، دیر، سوات، شانگلہ، کوہستان، مانسہرہ، ایبٹ آباد، پشاور، مردان، صوابی، کوہاٹ، بنوں اور ڈیرہ اسماعیل خان میں وقفے وقفے سے بارش اور پہاڑوں پر برفباری متوقع ہے۔

پنجاب کے شہروں راولپنڈی، مری، اٹک، چکوال، لاہور، فیصل آباد، سرگودھا، گوجرانوالہ، ملتان، بہاولپور اور رحیم یار خان سمیت دیگر علاقوں میں بھی آندھی اور گرج چمک کے ساتھ بارش کی پیشگوئی کی گئی ہے۔ سندھ کے اضلاع کراچی، حیدرآباد، سکھر، لاڑکانہ، ٹھٹہ، بدین اور تھرپارکر میں بھی مطلع ابر آلود رہنے کے ساتھ بارش اور ژالہ باری کا امکان ہے۔

بلوچستان کے کوئٹہ، ژوب، خضدار، چمن، تربت اور پنجگور سمیت دیگر اضلاع میں وقفے وقفے سے بارش اور ژالہ باری متوقع ہے۔ کشمیر اور گلگت بلتستان میں مطلع ابر آلود رہے گا اور پہاڑی علاقوں میں برفباری کے ساتھ وقفے وقفے سے بارش کا سلسلہ جاری رہنے کا امکان ہے۔